ஜம்மு காஷ்மீர் போல லடாக் யூனியன் பிரதேசத்துக்கும் சட்டசபையை உருவாக்க பாஜக, காங். கோரிக்கை

லே: ஜம்மு காஷ்மீர் யூனியன் பிரதேசத்தைப் போல லடாக் யூனியன் பிரதேசத்துக்கும் சட்டசபையை உருவாக்க வேண்டும் என்று பாஜக, காங். உள்ளிட்ட கட்சிகள் கோரிக்கை விடுத்துள்ளன.

ஜம்மு காஷ்மீருக்கான சிறப்பு அந்தஸ்து வழங்கும் அரசியல் சாசனத்தின் 370வது பிரிவு 2019-ம் ஆண்டு ரத்து செய்யபட்டது. இதையடுத்து ஜம்மு காஷ்மீர், லடாக் என 2 யூனியன் பிரதேசங்கள் உருவாக்கப்பட்டன.

சட்டசபை இல்லாத யூனியன் பிரதேசம்

இதில் ஜம்மு காஷ்மீர் சட்டசபையுடன் கூடிய யூனியன் பிரதேசமாக இருக்கும் என அறிவிக்கப்பட்டது. ஆனால் லடாக் யூனியன் பிரதேசத்துக்கு சட்டசபை இல்லை எனவும் முடிவு செய்யப்பட்டது.

டெல்லி பேச்சுவார்த்தை

இந்த நிலையில் ஜம்மு காஷ்மீரில் அரசியல் நடவடிக்கைகளை மேற்கொள்வது தொடர்பாக டெல்லியில் பிரதமர் மோடி இன்று அனைத்து கட்சித் தலைவர்களுடன் ஆலோசனை நடத்துகிறார். இந்த கூட்டத்தில் ஜம்மு காஷ்மீரின் 14 அரசியல் கட்சித் தலைவர்கள் பங்கேற்க உள்ளனர். இதனையடுத்து ஜம்மு காஷ்மீரில் பாதுகாப்பு ஏற்பாடுகள் பலப்படுத்தப்பட்டுள்ளன.

சட்டசபை கோரிக்கை

இதனிடையே ஜம்மு காஷ்மீர் போல லடாக் யூனியன் பிரதேசத்துக்கும் சட்டசபையை உருவாக்க வேண்டும் என்று பாஜக, காங்கிரஸ் கட்சிகள் வலியுறுத்தி உள்ளன. லேவில் நேற்று நடைபெற்ற பல்வேறு கட்சிகள், சமூக அமைப்புகளின் ஆலோசனை கூட்டத்தில் இந்த கோரிக்கை வலியுறுத்தப்பட்டது.

அமித்ஷாவிடம் வலியுறுத்த முடிவு

இது தொடர்பாக டெல்லியில் உள்துறை அமைச்சர் அமித்ஷாவை நேரில் சந்தித்து வலியுறுத்தவும் லடாக் அரசியல் கட்சிகள் முடிவு செய்துள்ளன. அத்துடன் டெல்லியில் இன்று நடைபெறும் பேச்சுவார்த்தைகளை கவனித்து அடுத்த கட்ட நடவடிக்கைகள் அறிவிக்கப்படும் என்றும் லடாக் அரசியல் கட்சிகள் தெரிவித்துள்ளன.

English summary

Ladakh Political parties also demanded for legislature and constitutional safeguards.