2014, 2019 தேர்தலில் சூரத் தொகுதியில் பாஜக பெற்ற வாக்குகள் எவ்வளவு தெரியுமா? அரண்டு போய்விடுவீங்க!

சூரத்: நாட்டின் தற்போதைய 18-வது லோக்சபா தேர்தலில் பாஜக முதல் வெற்றியை குஜராத் மாநிலம் சூரத் தொகுதியில் பெற்றுள்ளது. சூரத் தொகுதியில் காங்கிரஸ் மற்றும் சுயேட்சைகள் வேட்பு மனுக்கள் நிராகரிக்கப்பட்டதால் பாஜக வேட்பாளர் முகேஷ் தலால் வெற்றி பெற்றதாக அறிவிக்கப்பட்டுள்ளது.

குஜராத் மாநிலம் சூரத் லோக்சபா தேர்தலில் பாஜகவின் முகேஷ் தலால், காங்கிரஸின் நிலேஷ் கும்பானி உள்ளிட்டோர் வேட்பு மனுத் தாக்கல் செய்தனர். ஆனால் நிலேஷ் கும்பானி உள்ளிட்டோரின் வேட்பு மனுக்கள் தள்ளுபடி செய்யப்பட்டன. மேலும் சுயேட்சைகள் வேட்பு மனுக்களை வாபஸ் பெற்றனர். இதனால் பாஜகவின் முகேஷ் தலால் போட்டியின்றி வென்றுள்ளார். தற்போதைய 18-வது லோக்சபா தேர்தலில் பாஜகவுக்கு கிடைத்த முதல் வெற்றி இது.

சூரத் லோக்சபா தொகுதியில்தான் முன்னாள் பிரதமர் மொரார்ஜி தேசாய் 4 முறை வென்றார். 1989-ம் ஆண்டு முதல் தொடர்ந்து 9 முறை பாஜக வென்ற தொகுதி. தற்போது 10-வது முறையாக பாஜக போட்டியின்றி வெற்றி பெற்றுள்ளது.

பாஜக உருவான பின்னர் 1984-ல் சூரத்தில் முதல் தேர்தலை எதிர்கொண்டது. அத்தேர்தலில் பாஜகவுக்கு 44.25% வாக்குகள் கிடைத்தது.

1989 முதல் 2019-ம் ஆண்டு வரையிலான லோக்சபா தேர்தலில் பாஜக பெற்ற வாக்கு சதவீதம்:

1989- 62.75%
1991- 56.24%
1996- 61.07%
1998- 65.16%
1999- 68.82%
2004- 56.69%
2009- 52.45%
2014- 75.79%
2019- 74.47%.

2019-ல் காங்கிரஸ் கட்சிக்கு 23.16%; 2014-ல் 19.54% வாக்குகள்தான் கிடைத்தன. ஆனால் 2009-ம் ஆண்டு தேர்தலில் இத்தொகுதியில் காங்கிரஸ் 41.70% வாக்குகளைப் பெற்றிருந்தது. 2004-ம் ஆண்டு தேர்தலிலும் கூட காங்கிரஸ் 39.89% வாக்குகளை சூரத் தொகுதியில் பெற்றிருந்தது குறிப்பிடத்தக்கது.

English summary

BJP got above 70% votes is Gujarat's Surat in 2014, 2019 Lok Sabha Elections.