வேறவழி.. ஆட்சி கவிழாமல் இருக்க அமைச்சரவையை விரிவாக்கம் செய்கிறார் ம.பி. முதல்வர் கமல்நாத்
போபால்: தமது ஆட்சியை பாஜக கவிழ்க்காமல் இருக்க அமைச்சரவையை விரிவாக்கம் செய்யப் போகிறாராம் மத்திய பிரதேச முதல்வர் கமல்நாத்.
மத்திய பிரதேசத்தில் சொற்ப பெரும்பான்மையுடன் ஆட்சியில் இருந்து வருகிறார் முதல்வர் கமல்நாத். இதனால் அவரை ஆட்சியை கவிழ்த்து புதிய அரசு அமைப்பதில் பாஜக படுதீவிரமாக இருந்து வருகிறது.
ஆனால் பாஜகவின் ஒவ்வொரு முயற்சிக்கும் பதிலடி கொடுத்து வருகிறார் கமல்நாத். காங்கிரஸ் கட்சி எம்.எல்.ஏக்களை பாஜக வளைத்தால் பதிலுக்கு பாஜக எம்.எல்.ஏக்களை வளைத்து கெத்து காட்டி வருகிறார் கமல்நாத்.
இந்த முறை காங்கிரஸ் எம்.எல்.ஏக்களை டெல்லி, கர்நாடகா என பிற மாநிலங்களுக்கு அழைத்துச் சென்றது பாஜக. ஆனாலும் மனம்தளராத காங்கிரஸ் இம்முறை பாஜக எம்.எல்.ஏக்களை தங்கள் பக்கம் தாவ ரெடியாக வைத்திருந்தது.
இந்நிலையில் ஆட்சியைத் தக்க வைக்கும் வகையில் அதிருப்தி எம்.எல்.ஏக்களுக்கும் அமைச்சர் பதவி வழங்க முன்வந்துள்ளாராம் கமல்நாத். இது தொடர்பாக காங்கிரஸ் மூத்த தலைவர் திக்விஜய்சிங் கூறுகையில், தற்போதைய பட்ஜெட் கூட்டத் தொடர் முடிந்த பின்னர் அமைச்சரவையில் கமல்நாத் மாற்றம் கொண்டுவருவார் என கூறியுள்ளார்.