மிசோரமில் யாருக்கும் பெரும்பான்மை இல்லை- தொங்கு சட்டசபைதான்.. பாஜக சீனிலேயே இல்லையாம்- புது சர்வே!

ஐஸ்வால்: மிசோரம் சட்டசபை தேர்தலில் எந்த கட்சிக்கும் பெரும்பான்மை கிடைக்காது; இந்த தேர்தலில் தொங்கு சட்டசபைக்குதான் சாத்தியம் என்கிறது Manorama News-VMR கருத்து கணிப்பு.

மிசோரம் சட்டசபையில் மொத்தம் 40 இடங்கள் உள்ளன. இம்மாநிலத்தில் பெரும்பான்மைக்கு தேவை 21 இடங்கள். மிசோரமில் தற்போது மிசோ தேசிய முன்னணி ஆட்சியில் உள்ளது. இந்த ஆட்சியில் பாஜகவும் இணைந்திருக்கிறது.

மிசோரம் பாஜக: மணிப்பூர் வன்முறைகளைத் தொடர்ந்து பாஜகவிடம் இருந்து மிசோ தேசிய முன்னணி விலகி நிற்கிறது. சட்டசபை தேர்தலிலும் பாஜக வேட்பாளர்களுக்கு எதிராக 23 இடங்களில் மிசோ தேசிய முன்னணி வேட்பாளர்களை நிறுத்தி உள்ளது.

மிசோரம் தேர்தல்: மிசோரம் மாநிலத்தில் ஆளும் மிசோ தேசிய முன்னணி, ஜோரம் மக்கள் இயக்கம், காங்கிரஸ், பாஜக ஆகியவை பிரதான கட்சிகள். இம்மாநில சட்டசபை தேர்தல் நாளை மறுநாள் நடைபெற உள்ளது. அன்றைய தினம் பதிவாகும் வாக்குகள் அடுத்த மாதம் 3-ந் தேதி எண்ணப்பட்டு முடிவுகள் அறிவிக்கப்படும்.

தொங்கு சட்டசபை: மிசோரம் மாநில தேர்தல் தொடர்பான பெரும்பாலான கருத்து கணிப்புகள், மிசோரமில் தொங்கு சட்டசபைக்குதான் சாத்தியம்; பெரும்பான்மையை எந்த கட்சியுமே பெறாது என்றே கணித்துள்ளன. மிசோரம் தேர்தல் நடைபெறும் நிலையில் Manorama News-VMR வெளியிட்ட கருத்து கணிப்புகளிலும் இது உறுதி செய்யப்பட்டுள்ளது.

யாருக்கு எத்தனை இடங்கள்?: Manorama News-VMR கருத்து கணிப்பு முடிவுகள்: ஆளும் மிசோ தேசிய முன்னணி 11-15 இடங்கள்; காங்கிரஸ் 12 முதல் 16 இடங்கள்; ஜோரம் மக்கள் இயக்கம் 10 முதல் 14 இடங்கள். 2018 தேர்தலில் மிசோ தேசிய முன்னணி 27, காங்கிரஸ் 4, ஜோரம் மக்கள் இயக்கம் 8 இடங்களில் வென்றிருந்தன. இத்தேர்தலில் பாஜக உள்ளிட்ட இதர கட்சிகளுக்கு 1 அல்லது 2 இடங்களுக்கு சாத்தியம். அதாவது மிசோரம் சட்டசபை தேர்தலில் பாஜக சீனிலேயே இல்லை என்கிறது இக்கருத்து பணிப்பு.

கூட்டணி ஆட்சி: மிசோரமில் மிசோ தேசிய முன்னணியும் காங்கிரஸும் இணைந்து கூட்டணி அரசு அமைக்கலாம்; ஜோரம் மக்கள் இயக்கமும் காங்கிரஸும் புதிய கூட்டணி ஆட்சியை அமைக்கலாம். மிசோ தேசிய முன்னனியும் ஜோரம் மக்கள் இயக்கும் பாஜகவுடன் கூட்டணியே வைக்க மாட்டோம் என்கின்றன. ஆனால் பாஜகவோ நாங்கள் இல்லாத கூட்டணி ஆட்சியே சாத்தியம் இல்லை என்கிறது.

English summary

Manorama News-VMR predicted the Hung Assembly in the Mizoram Assembly Election 2023.