பாஜக தலைமையகத்தில் நரேந்திர மோடி! ஆதரவாளர்கள் உற்சாக வரவேற்பு!

By Mathi

Updated: Friday, September 13, 2013, 20:40 [IST]

Subscribe to Oneindia Tamil

டெல்லி: பாரதிய ஜனதா கட்சியின் நாடாளுமன்ற குழுக் கூட்டத்தில் கலந்து கொள்வதற்காக கட்சி தலைமையகத்துக்கு சென்ற குஜராத் முதல்வர் நரேந்திர மோடிக்கு அவரது ஆதரவாளர்கள் உற்சாக வரவேற்பளித்தனர்.

பாஜகவின் பிரதமர் வேட்பாளராக நரேந்திர மோடியை ஏற்க மறுத்த அத்வானி, சுஷ்மா ஸ்வராஜ் ஆகியோரை பாஜகவின் தாய் அமைப்பான ஆர்.எஸ்.எஸ். இயக்கத்தின் தூதராக நிதின் கத்காரி டெல்லியில் இன்று சந்தித்து பேசினார்.

அதே நேரத்தில் இன்று காலை குஜராத்தின் காந்திநகர் இல்லத்தில் வழக்கம்போல அரசு அதிகாரிகளுடன் ஆலோசனை நடத்திக் கொண்டும் கோப்புகளில் கையெழுத்திட்டுக் கொண்டும் இருந்தார் நரேந்திர மோடி.

இந்நிலையில் இன்று மாலை தாம் புத்தக வெளியீட்டு விழாவில் கலந்து கொள்ள இயலவில்லை என்று கூறி 3 மணியளவில் அகமதாபாத்தில் இருந்து பாஜகவின் நாடாளுமன்ற குழுக் கூட்டத்தில் கலந்து கொள்வதற்காக டெல்லிக்குப் புறப்பட்டார். மாலை 5 மணியளவில் டெல்லி வந்தடைந்தார் மோடி. அவர் நாடாளுமன்ற குழு கூட்டத்துக்கு முன்பாக அத்வானியை சந்தித்து பேசுவார் என்று கூறப்பட்டது. ஆனால் அத்வானியை மோடி சந்திக்கவில்லை.

பாஜக தலைவர் ராஜ்நாத்தை நரேந்திர மோடி சந்தித்து ஆலோசனை நடத்தினார். சிறிது நேர ஆலோசனைக்குப் பின்னர் பாஜக தலைமையகத்துக்கு சென்றார் நரேந்திர மோடி. அங்கு அவரது ஆதரவாளர்கள் உற்சாக வரவேற்பு அளித்தனர்.

இதனிடையே நரேந்திர மோடியை பிரதமர் வேட்பாளராக ஏற்றுக் கொள்வதாக மூத்த பாஜக தலைவர் முரளி மனோகர் ஜோஷி கருத்து தெரிவித்துள்ளார். இவர் ஏற்கெனவே மோடிக்கு கடும் எதிர்ப்பு தெரிவித்து அத்வானி அணியில் இருந்தவர் என்பது குறிப்பிடத்தக்கது.