டெல்லி டூ மும்பைக்கு புதிய ராஜ்தானி விரைவு ரயில்... - 13 மணிநேரத்தில் பயணிக்கலாம்!

டெல்லியிலிருந்து மும்பை செல்ல மீண்டும் ஒரு புதிய ரயிலை இயக்க இந்திய ரயில்வே திட்டமிட்டு வருகிறது.

டெல்லி: டெல்லியிருந்து மும்பைக்கு மணிக்கு 130 கிலோ மீட்டர் வேகத்தில் செல்லும் புதிய விரைவு ரயிலை அறிமுகப்படுத்த இந்திய ரயில்வே துறை திட்டமிட்டுள்ளது.

டெல்லியில் இருந்து மும்பைக்கு ஆகஸ்டு கிரந்தி ராஜ்தானி, மும்பை சென்ட்ரல் - டெல்லி ராஜ்தானி ஆகிய இரண்டு விரைவு ரயில்கள் தற்போது இயக்கப்பட்டு வருகிறது. இதன் மூலம் பயண நேரம் 2 மணி நேரம் குறைகிறது.

அதில் ஆகஸ்டு கிரந்தி ராஜ்தானி ரயில், டெல்லியிருந்து மும்பை செல்ல 17 மணி நேரம் ஆகிறது. மும்பை சென்ட்ரல் - டெல்லி ராஜ்தானி ரயில் 15 மணி நேரம் 35 நிமிடங்களில் டெல்லியில் இருந்து மும்பை வந்தடைகிறது.

இந்நிலையில், இன்னும் குறைந்த நேரத்தில் புதிய ரயிலை இயக்க இந்திய ரயில்வே திட்டமிட்டு வருகிறது. இன்னும் சில நாட்களில் புதிய ரயில் சேவையை இயக்கி முன்னோட்டம் பார்க்க ரயில்வேத் துறை திட்டமிட்டு வருகிறது என ரயில்வே அதிகாரிகள் தெரிவித்தனர்.

மேலும், மும்பை சென்ட்ரல் - டெல்லி ராஜ்தானி ரயில் வேகத்தை 89 கி.மீ வேகத்தில் இருந்து மணிக்கு 130 கி.மீ வேகத்தில் இயக்க முயற்சி எடுக்கப்பட்டு வருவதாகக் கூறப்படுகிறது. அதேநேரத்தில் புது விரைவு ரயிலையும் இயக்க முயற்சிகள் மேற்கொள்ளப்பட்டு வருகிறது.

இந்த முயற்சிகள் மூலம் பயண நேரத்தை இன்னும் இரண்டு மணி நேரம் குறைக்க வேண்டும் என்பதே நோக்கம் என ரயில்வே துறை அதிகாரிகள் தெரிவித்தனர்.

English summary

Indian Railway planned to introduce new express train from Delhi to mumbai soon.