Odisha Assembly election results: நவீன் பட்நாயக்கிற்கு பெரிய அடி.. வெற்றியை நோக்கி முன்னேறும் பாஜக!
புவனேஸ்வர்: ஒடிசா சட்டசபை தேர்தல் வாக்கு எண்ணிக்கையில், நவீன் பட்நாயக்கின் பிஜு ஜனதா தளம் பின்னடைவை சந்தித்து வருகிறது. நவீன் பட்நாயக், காந்தபாஞ்சி தொகுதியில் பின்னடைவைச் சந்தித்துள்ளார். ஒடிசாவில் ஆட்சியை பிடிக்க 74 இடங்கள் தேவை என்ற நிலையில் தற்போது பாஜக 65 இடங்களில் முன்னிலை வகிக்கிறது.
மக்களவைத் தேர்தலோடு ஒடிசாவில் 147 சட்டப்பேரவை தொகுதிகளுக்கும் நான்கு கட்டங்களாக தேர்தல் நடத்தப்பட்டது. ஒடிசாவில் 63.46 சதவீத வாக்குகள் பதிவானது. பாஜக மற்றும் பிஜு ஜனதா தளம் (பிஜேடி) இடையே தான் கடும் போட்டி நிலவுகிறது. 24 ஆண்டுகளாக ஒடிசாவில் ஆட்சியில் இருக்கும் பிஜேடி ஆட்சியை அகற்ற வேண்டும் என்று பாஜக தீவிர பிரச்சாரம் மேற்கொண்டதால் ஒடிசா தேர்தல் களம் நாட்டில் உன்னிப்பாக கவனிக்கப்படுகிறது.
24 ஆண்டுகளாக ஒடிசா முதல்வராக இருந்து வரும் நவீன் பட்நாயக் மீண்டும் தேர்ந்தெடுக்கப்பட்டால், ஆறாவது முறையாக ஆட்சியைப் பிடிப்பார். சிக்கிம் முன்னாள் முதல்வர் பவன் குமார் சாம்லிங்கின் சாதனையை முறியடித்து, இந்தியாவில் நீண்ட காலம் முதல்வராக இருந்தவர் என்ற பெருமையை அவர் பெறுவார்.
2019ல் நடைபெற்ற ஒடிசா சட்டப் பேரவை தேர்தலில் மொத்தமுள்ள 147 இடங்களில் 112 இடங்களை கைப்பற்றி பெரும்பான்மை பலத்துடன் நவீன் பட்நாயக்கின் பிஜேடி ஆட்சி அமைத்தது. பாஜக 23 இடங்களிலும், காங்கிரஸ் 9 இடங்களிலும் வெற்றி பெற்றன.
இந்நிலையில் தற்போதைய வாக்கு எண்ணிக்கை நிலவரப்படி, 11 மணி நிலவரப்படி பாஜக 65 சட்டப்பேரவை தொகுதிகளில் முன்னிலை பெற்றுள்ளது. அதேநேரம் பிஜேடி 45 சட்டப்பேரவை தொகுதிகளில் முன்னிலை வகிக்கிறது. காங்கிரஸ் 10 சட்டப்பேரவை தொகுதிகளில் முன்னிலை வகிக்கிறது.
தற்போதைய ஒடிசா முதல்வர் நவீன் பட்நாயக் போட்டியிடும் இரண்டு தொகுதிகளில், காந்தபாஞ்சியில் அவர் 521 வாக்குகள் வித்தியாசத்தில் லேசான பின்னடைவைச் சந்தித்துள்ளார். அந்த தொகுதியில் பாஜகவின் லக்ஷ்மண் பக் முந்தியுள்ளார்.
ஒடிசா சட்டசபை தேர்தலில் நவீன் பட்நாயக் தலைமையிலான அரசில் பதவி வகித்து வந்த அமைச்சர்கள் பலர் பின்னடைவைச் சந்தித்துள்ளனர். ஒடிசாவில் ஆட்சி அமைக்க 74 தொகுதிகளில் வெல்ல வேண்டும். பெரும்பான்மை தொகுதிகளை நோக்கி பாஜக முன்னேறி வருகிறது.
ஒடிசாவில் பாஜக வெற்றியை நோக்கி நகர்ந்து வரும் நிலையில் புவனேஷ்வரில் உள்ள பாஜக அலுவலகத்தில் கொண்டாட்டங்கள் தொடங்கியுள்ளன.
Click it and Unblock the Notifications
Sign in with Google