ஒடிஷா முதல்வர் நவீன் பட்நாயக் "வலது கரம்" தமிழகத்தின் விகே பாண்டியன் IAS.. கிடைத்தது 'சூப்பர்' பதவி!
புவனேஸ்வர்: ஒடிஷா மாநில முதல்வர் நவீன் பட்நாயக்கின் தனிச் செயலாளர் பதவியில் இருந்து விருப்ப ஓய்வு பெற்ற தமிழ்நாட்டைச் சேர்ந்த ஐ.ஏ.எஸ். அதிகாரி வி.கே. பாண்டியனுக்கு கேபினட் அமைச்சர் அந்தஸ்திலான புதிய பதவி வழங்கப்பட்டுள்ளது பேசு பொருளாகி இருக்கிறது.
தமிழ்நாட்டைச் சேர்ந்த ஐஏஎஸ், ஐபிஎஸ் அதிகாரிகள் பிற மாநிலங்களில் முதன்மை பதவி வகித்து வந்துள்ளனர். தமிழ்நாடு தலைமை செயலாளராக இருந்து ஓய்வு பெற்ற இறையன்புவின் சகோதரர் திருப்புகழ், மோடி குஜராத் முதல்வராக இருந்த போது உறுதுணையாக இருந்த ஐ.ஏ.எஸ்.அதிகாரி. ஒடிஷா மாநிலத்தில் கூடுதல் தலைமை செயலாளராக தமிழ்நாட்டின் ஆர்.பாலகிருஷ்ணன் ஐ.ஏ.எஸ். பணியாற்றினார். தற்போது ஒடிஷா மாநில அரசின் சிறப்பு ஆலோசகராக பணியாற்றுகிறார். இந்த வரிசையில் தமிழ்நாட்டைச் சேர்ந்த வி.கே.பாண்டியன் ஐ.ஏ.எஸ், ஒடிஷா மாநில அரசிலும் அரசியலிலும் நீண்டகாலம் பேசு பொருளாக இருப்பவர். முதல்வர் நவீன் பட்நாயக்கின் தனி செயலாளராகவும் ஒரு கட்டத்தில் பிஜூ ஜனதா தளத்தின் முதன்மை அதிகார மையமாகவும் உருவெடுத்தவர் விகே பாண்டியன்.
பாஜகவினர் தாக்குதல்: 2018-ம் ஆண்டு விகே பாண்டியன், அவரது மனைவி சுஜாதா கார்த்திகேயன் உள்ளிட்ட சில ஐ.ஏ.எஸ். அதிகாரிகள், முதல்வர் நவீன் பட்நாயக்கின் பிஜூ ஜனதா தளம் கட்சிக்கு ஆதரவாக செயல்படுவதால் டிஸ்மிஸ் செய்ய வேண்டும் என பாஜக வலியுறுத்தி இருந்தது. அப்போது விகே பாண்டியன் இல்லம் மீது பாஜகவினர் தாக்குதல் நடத்தியும் இருந்தனர்.
விருப்ப ஓய்வு: இந்நிலையில் ஒடிஷா முதல்வர் நவீன் பட்நாயக்கின் முதன்மை செயலாளராக பதவி வகித்த நிலையில் விருப்ப ஓய்வு பெற விண்ணப்பித்திருந்தார் விகே பாண்டியன். இதற்கு மத்திய அரசும் ஒப்புதல் கொடுத்திருந்தது.
புதிய பதவி: தற்போது விகே பாண்டியன், விருப்ப ஓய்வு பெற்ற மறுநாளே முதல்வர் நவீன்பட்நாயக், அதிமுக்கிய பதவியை வழங்கி உள்ளார். ஒடிஷா அரசின் நடவடிக்கைகளுக்கு ஆதாரமாக இருப்பது 5T திட்டம். அரசின் பல்வேறு செயல்பாடுகளை ஒருங்கிணைக் கூடிய இந்த 5T திட்டம் மற்றும் நபின் ஒடிஷா தலைவராக தற்போது விகே பாண்டியன் நியமிக்கப்பட்டுள்ளார். இது கேபினட் அமைச்சர் அந்தஸ்துள்ள பதவி. முதல்வர் நவீன் பட்நாயக்கின் கீழ் நேரடியாக கேபினட் அமைச்சர் அந்தஸ்துடன் விகே பாண்டியன் பணியாற்றுவார் என அதிகாரப்பூர்வமாக அறிவிக்கப்பட்டுள்ளது.
Click it and Unblock the Notifications
Sign in with Google