பாஜக குஷி- ஒடிஷா ராஜ்யசபா தேர்தலில் பிஜூ ஜனதா தளம் திடீர் ஆதரவு- NDA கூட்டணிக்கு திரும்பும் நவீன்ஜி?

புவனேஸ்வர்: ஒடிஷா ராஜ்யசபா தேர்தலில் பாஜகவை சேர்ந்த மத்திய அமைச்சர் அஸ்வினி வைஷ்ணவுக்கு ஆதரவு தெரிவிப்பதாக ஆளும் பிஜூ ஜனதா தளம் அறிவித்துள்ளது பெரிய திருப்பமாக பார்க்கப்படுகிறது.

ஒடிஷாவில் மொத்தம் 3 ராஜ்யசபா எம்பி இடங்களுக்கான தேர்தல் நடைபெற உள்ளது. ஒடிஷாவின் ஆளும் பிஜூ ஜனதா தளத்தின் அமர் பட்நாயக், பிரசந்தா, நந்தா, பாஜகவின் மத்திய அமைச்சர் அஸ்வினி வைஷ்ணவ் ஆகியோரது ராஜ்யசபா எம்பி பதவி காலம் ஏப்ரலில் முடிவடைவதால் இந்த தேர்தல் நடைபெற உள்ளது.

ஒடிஷா சட்டசபையில் மொத்தம் 147 எம்.எல்.ஏக்கள் உள்ளனர். ஆளும் பிஜூ ஜனதா தளத்துக்கு 111 எம்.எல்.ஏக்களும் பாஜகவுக்கு 22 எம்.எல்.ஏக்களும் உள்ளனர். காங்கிரஸ் 8, சிபிஎம் 1 எம்.எல்.ஏ. உள்ளனர்.

ஒடிஷா ராஜ்யசபா தேர்தல்: இந்த நிலையில் ஒடிஷா ராஜ்யசபா தேர்தலில் பிஜூ ஜனதா தளத்தின் தேபாஷிஸ் சமந்த்ராய், சுபாஷிஷ் குனிதா ஆகியோர் போட்டியிடுவர் என முதல்வர் நவீன் பட்நாயக் அறிவித்திருந்தார். ஆனால் 3-வது வேட்பாளரை பிஜூ ஜனதா தளம் நிறுத்தவில்லை. பிஜூ ஜனதா தளத்தின் இந்த நிலைப்பாடு விவாதப் பொருளானது.

பிஜூ ஜனதா தளம் திடீர் ஆதரவு: தற்போது ஒடிஷா ராஜ்யசபா தேர்தலில் மத்திய அமைச்சர் அஸ்வினி வைஷ்ணவ் போட்டியிடுவார் என டெல்லி பாஜக மேலிடம் அறிவித்தது. இதனைத் தொடர்ந்து மாநிலத்தின் நலன் கருதி பாஜக வேட்பாளர் அஸ்வினி வைஷ்ணவ்வை ஆதரிப்பதாக பிஜூ ஜனதா தளம் திடீரென அறிவித்திருப்பது பெரும் திருப்பமாக பார்க்கப்படுகிறது.

பாஜக கூட்டணிக்கு திரும்புதா?: ஒடிஷாவில் ஆளும் பிஜூ ஜனதா தளம் கட்சியும் நீண்டகாலம் பாஜக தலைமையிலான தேசிய ஜனநாயகக் கூட்டணியில் நீடித்தது. பின்னர் பாஜகவுடனான கூட்டணியை முறித்துக் கொண்டது. அதேநேரத்தில் நாடாளுமன்றத்தில் பல்வேறு சூழல்களில் மத்திய பாஜக அரசுக்கு ஆதரவாகவும் செயல்பட்டு வருகிறது பிஜூ ஜனதா தளம். ஒடிஷாவில் ஆளும் பிஜூ ஜனதா தளத்துக்கு எதிரான கட்சியாக பாஜக இருக்கிறது. காங்கிரஸ் தமது இருப்பை இழந்து கொண்டிருக்கிறது. தற்போது லோக்சபா தேர்தல் நெருங்கும் நிலையில் தேசிய ஜனநாயகக் கூட்டணியை வலுப்படுத்துவதில் பாஜக மேலிடம் தீவிரம் காட்டுகிறது. இந்த பின்னணியில் ராஜ்யசபா தேர்தலில் பாஜகவின் மத்திய அமைச்சர் அஸ்வினி வைஷ்ணவுக்கு பிஜூ ஜனதா தளம் ஆதரவை தெரிவித்திருக்கிறது. இதனால் தேசிய ஜனநாயகக் கூட்டணிக்கு மீண்டும் பிஜூ ஜனதா தளம் திரும்புமா? என்கிற விவாதம் எழுந்துள்ளது.

அதிமுக, அகாலி தளம், தெலுங்குதேசம்: தேசிய ஜனநாயகக் கூட்டணியை வலுப்படுத்தும் வகையில் அகாலி தளம், தெலுங்குதேசம் மற்றும் அண்ணா திமுகவை மீண்டும் பாஜக அணிக்கு கொண்டு வருவதற்கும் தீவிர முயற்சிகள் மேற்கொள்ளப்பட்டு வருகின்றன. தமிழ்நாடு சட்டசபையில் திடீரென அதிமுக மூத்த தலைவர் தங்கமணியும் பாஜக எம்.எல்.ஏ. வானதி சீனிவாசனும் 15 நிமிடம் பேச்சுவார்த்தை நடத்தினர். முன்னதாக தமிழ் மாநில காங்கிரஸ் தலைவர் ஜிகே வாசன், அதிமுகவை பாஜக அணிக்கு கொண்டு வரும் முயற்சிகளை மேற்கொண்டிருந்தார். ஆந்திராவில் சந்திரபாபு நாயுடு அண்மையில் டெல்லியில் முகாமிட்டு பாஜக கூட்டணிக்கு திரும்புவது தொடர்பான பேச்சுவார்த்தைகளை நடத்தி இருந்ததும் குறிப்பிடத்தக்கது.

English summary

BJD has extended its support to BJP Candidate Ashwini Vaishnaw in the Odisha Rajya Sabha Election.