பாஜகவை எதிர்க்கும் கட்சித் தலைவர்கள், முதல்வர்கள் சங்கமிக்கும் குமாரசாமி பதவியேற்பு விழா!
கர்நாடகா முதல்வராக குமாரசாமி பதவியேற்க உள்ளார். இதில் பங்கேற்க பல்வேறு கட்சித் தலைவருக்கு அழைப்பு விடுக்கப்பட்டுள்ளது.
பெங்களூரு: மதச்சார்பற்ற ஜனதா தளத்தின் குமாரசாமி, கர்நாடகாவின் 24வது முதல்வராக பதவியேற்கும் விழாவில் ராகுல் காந்தி, சோனியா காந்தியைத் தவிர பல்வேறு மாநிலக் கட்சித் தலைவர்களும் பங்கேற்க உள்ளனர்.
கர்நாடக முதல்வராக பதவியேற்ற பாஜகவின் எடியூரப்பா, பெரும்பான்மையை நிரூபிக்க முடியாமல் 58 மணி நேரத்தில் பதவியில் இருந்து விலகினார்.
சட்டசபை தேர்தலில் 78 தொகுதிகளில் வென்ற காங்கிரஸ் கட்சி,. 37 தொகுதிகளில் வென்ற மதச்சார்பற்ற ஜனதா தளத்துடன் இணைந்து கூட்டணி அரசு அமைக்க உரிமை கோரியது.
அதையடுத்து மஜத தலைவர் குமாரசாமியை முதல்வராக பதவியேற்கும்படி கர்நாடக ஆளுநர் வாஜூபாய் வாலா இன்று அழைப்பு விடுத்தார்.
வரும் திங்கள்கிழமை பெங்களூரு காண்டீவரா மைதானத்தில் பதவியேற்பு விழா நடக்க உள்ளது.
இதில் பங்கேற்கும்படி காங்கிரஸ் தலைவர் ராகுல் காந்தி, சோனியா காந்தி உள்ளிட்டோருக்கு குமாரசாமி அழைப்பு விடுத்துள்ளார்.
இதைத் தவிர பல்வேறு மாநிலக் கட்சித் தலைவர்களுக்கும் அவர் அழைப்பு விடுத்துள்ளார். பகுஜன் சமாஜ் கட்சித் தலைவர் மாயாவதி, திரிணமுல் காங்கிரஸ் தலைவரும் மேற்கு வங்க முதல்வருமான மம்தா பானர்ஜிக்கு அழைப்பு விடுக்கப்பட்டுள்ளது.
2019 நாடாளுமன்றத் தேர்தலுக்கு வலுவான கூட்டணியை அமைக்கும் முயற்சியில் காங்கிரஸ் உள்ளது. அதன்படி, ராஷ்ட்ரீய ஜனதா தளத்தில் தேஜஸ்வி யாதவ், சமாஜ்வாதி கட்சித் தலைவர் அகிலேஷ் யாதவ், திமுக செயல் தலைவர் ஸ்டாலின் ஆகியோருக்கும் அழைப்பு விடுக்கப்பட்டுள்ளது.
இதைத் தவிர ஆந்திர முதல்வர் சந்திரபாபு நாயுடு, தெலுங்கானா முதல்வர் சந்திரசேகர ராவ் ஆகியோருக்கும் குமாரசாமி அழைப்பு விடுத்துள்ளதாக தகவல்கள் தெரிவிக்கின்றன.
குமாரசாமியின் பதவியேற்பு விழா, பாஜகவுக்கு எதிரான கட்சிகள் சங்கமிக்கும் கூட்டமாக அமைய உள்ளது.
Click it and Unblock the Notifications
Sign in with Google