அடேங்கப்பா... நடிகர் கார்த்திக் அணியில் பாஸ்வான் கட்சி...டெல்லி பேச்சுவார்த்தையில் உடன்பாடு

டெல்லி: தமது தலைமையிலான விடியல் கூட்டணியில் மத்திய அமைச்சர் ராம்விலாஸ் பாஸ்வானின் லோக் ஜனசக்தி இணைய உள்ளதாக நாடாளும் மக்கள் கட்சித் தலைவர் நடிகர் கார்த்திக் தெரிவித்துள்ளார். டெல்லியில் நடைபெற்ற பேச்சுவார்த்தையில் இதற்கான உடன்பாடு எட்டப்பட்டதாகவும் கார்த்திக் கூறினார்.

சட்டசபை தேர்தலில் திமுக கூட்டணியில் நடிகர் கார்த்திக்கின் நாடாளும் மக்கள் கட்சி இணையக் கூடும் என கூறப்பட்டது. ஆனால் திமுக, கார்த்திக் கட்சியை கழற்றிவிட்டது.

இதனைத் தொடர்ந்து அதிமுக அணியில் இருந்து விலகிய டாக்டர் சேதுராமனின் மூவேந்தர் முன்னணி கழகம் உள்ளிட்ட சில கட்சிகளுடன் இணைந்து விடியல் கூட்டணியை நடிகர் கார்த்திக் உருவாக்கினார். இதனிடையே டெல்லி சென்ற நடிகர் கார்த்திக் மத்திய அமைச்சரும் லோக் ஜனசக்தி தலைவருமான ராம்விலாஸ் பாஸ்வானை நேற்று சந்தித்து பேசினார்.

பின்னர் செய்தியாளர்களிடம் நடிகர் கார்த்திக் கூறியதாவது:

வருகிற தமிழக சட்டசபை தேர்தலில் விடியல் கூட்டணியில் பங்கேற்கும் கட்சிகள் பற்றிய இறுதி முடிவை எடுத்து வருகிறோம். இது தொடர்பாக லோக் ஜனசக்தி கட்சித்தலைவர் ராம்விலாஸ் பஸ்வானை சந்தித்து ஆலோசனை நடத்தினேன்.

தமிழகத்தில் விடியல் கூட்டணியின் தேர்தல் பணிகள் குறித்தும் தொகுதிப் பங்கீடு, பிரசார உத்திகள் குறித்தும் நாங்கள் விரிவாக பேசினோம். அப்போது அவர், விடியல் கூட்டணியில் சேருவது குறித்து தனது மகிழ்ச்சியை தெரிவித்தார். இது குறித்து ஓரிரு நாட்களில் அதிகாரப்பூர்வமாக அறிவிப்பை வெளியிடுவோம்.

அத்துடன் விடியல் கூட்டணியில் வேறு எந்தெந்த கட்சிகள் பங்கேற்கும் என்ற விவரத்தையும் விரைவில் அறிவிப்போம். எங்கள் கூட்டணி மிகவும் வலுவாக அமைந்து வருகிறது. வருகிற தேர்தலில் இந்தக் கூட்டணி பெருமளவில் வெற்றி பெறும் என்ற நம்பிக்கை எங்களுக்கு உள்ளது.

ராம்விலாஸ் பஸ்வான் விரைவில் தமிழகத்துக்கு வருகை தந்து எங்கள் கூட்டணிக்கு ஆதரவாக பிரசாரத்தை மேற்கொள்வார். இது குறித்த விவரங்கள் விரைவில் வெளியிடப்படும்.

இவ்வாறு நடிகர் கார்த்திக் கூறினார்.

English summary

Actor Karthik said Union Minister Ramvilas Paswan's LJS will join his 'Vidiyal Alliance".