காங்கிரஸில் தொடரும் கலகக் குரல்... சோனியாவுக்கு எதிராக போர்க்கொடி தூக்கினார் ஜனார்த்தன் திவேதி!
டெல்லி: காங்கிரஸ் கட்சியில் அடுத்தடுத்து கலகக் குரல்கள் வெடித்து வருகின்றன.. தற்போது காங்கிரஸ் மேலிடத்தின் நடவடிக்கைகளை கட்சியின் மூத்த தலைவர் ஜனார்த்தன் திவேதி கடுமையாக சாடியுள்ளார்.
லோக்சபா தேர்தலில் காங்கிரஸ் கட்சி படுதோல்வியை சந்தித்தது. இதனைத் தொடர்ந்து காங்கிரஸ் கட்சியில் சோனியா மற்றும் ராகுல் தலைமைக்கு எதிராக அவ்வப்போது கலகக் குரல்கள் வெடித்து வருகின்றன.
சோனியா, ராகுல் ஓய்வு பெறனும்..
கடந்த சில நாட்களுக்கு முன்பாக காங்கிரஸ் காரியக் கமிட்டியின் முன்னாள் உறுப்பினர் ஜக்மீத்சிங் பிரார், சோனியாவும் ராகுல் காந்தியும் 2 ஆண்டுகாலத்துக்கு கட்சியை விட்டு வெளியேறி ஓய்வு எடுக்க வேண்டும் என்று கூறியிருந்தார். இது காங்கிரஸில் சலசலப்பை ஏற்படுத்தியிருந்தது.
ஜனார்த்தன் திவேதி போர்க்கொடி
தற்போது மூத்த காங்கிரஸ் தலைவர்களில் ஒருவரான ஜனார்த்தன் திவேதியும் காங்கிரஸ் மேலிடத்தை கடுமையாக விமர்சித்துள்ளார். ஜக்மீத்சிங் விமர்சனம் பற்றி கருத்து தெரிவித்த ஜனார்த்தன் திவேதி, நான் தனிப்பட்ட நபர்களைப் பற்றி விமர்சிக்க விரும்பவில்லை. ஆனால் எந்த ஒரு அமைப்பிலும் மற்றவர்கள் சொல்வதைக் கேட்கின்ற பொறுமை மிகவும் அவசியம். நாம் சொல்வதை மற்றவர்கள் கேட்டாக வேண்டிய நிலையை உருவாகக் கூடாது என்று கூறியுள்ளார்.
காங்கிரஸ் மறுப்பு
காங்கிரஸ் தலைவர் சோனியா மற்றும் அவரது மகன் ராகுலை பகிரங்கமாக ஜனார்த்தன் திவேதி விமர்சித்துள்ளது குறித்து செய்தியாளர்களிடம் பேசிய அக்கட்சி செய்தித் தொடர்பாளர் ரந்தீப் சுர்ஜிவாலா, திவேதியின் கருத்து என்ன என்பது எனக்கு தெரியவில்லை. அது பற்றி தெரிந்த பின்னர் கருத்து தெரிவிக்கிறேன் என்றார்.
பொருளாதார இடஒதுக்கீடு
ஜனார்த்தன் திவேதி இப்படி சர்ச்சைகளை கிளப்புவது ஒன்றும் புதியதும் அல்ல. லோக்சபா தேர்தலின் போது சமூக நீதிக்கான இடஒதுக்கீடு அடிப்படையை முடிவுக்குக் கொண்டு வந்து பொருளாதார அடிப்படையிலான இடஒதுக்கீட்டை நடைமுறைப்படுத்த வேண்டும் எனக் கூறியவர் என்பது குறிப்பிடத்தக்கது.
பிரியங்கா வருகையால் கோபம்?
இதனிடையே காங்கிரஸ் கட்சிக்கு புத்துயிர் ஊட்டுவதற்காக பிரியங்கா காந்தி களம் இறக்கப்படலாம் என்றும் அவருக்கு ஜனார்த்தன் திவேதி வசம் இருக்கும் தேசிய பொதுச்செயலர் பதவி கொடுக்கப்படலாம் என்றும் கூறப்பட்டு வருகிறது. இந்த அதிருப்தியின் வெளிப்பாடாக காங்கிரஸ் மேலிடத்தை அவர் விமர்சித்திருக்கலாம் என்றும் கூறப்படுகிறது.
Click it and Unblock the Notifications
Sign in with Google