அமெரிக்காவில் டிசிஎஸ் ஊழியரின் 2 மாத ஆண் குழந்தையை எடுத்துச் சென்ற அதிகாரிகள்

ஜெய்பூர்: அமெரிக்காவில் டிசிஎஸ் ஊழியரான இந்தியரின் 2 மாத ஆண் குழந்தையை அவரிடம் இருந்து பிரித்துள்ளனர் அதிகாரிகள்.

ராஜஸ்தான் மாநிலம் ஜெய்பூரைச் சேர்ந்தவர் ஆசிஷ் பாரீக். டிசிஎஸ் ஊழியரான அவர் ப்ராஜெக்ட் விஷயமாக கடந்த ஆகஸ்ட் மாதம் அமெரிக்காவுக்கு அனுப்பி வைக்கப்பட்டார். அவர் தனது கர்ப்பிணி மனைவியுடன் நியூஜெர்சி நகருக்கு சென்றார்.

இந்நிலையில் கடந்த அக்டோபர் மாதம் 21ம் தேதி அவரது மனைவி விதிஷா அஷ்வித் என்ற ஆண் குழந்தையை பெற்றெடுத்தார். டிசம்பர் 23ம் தேதி மருத்துவமனைக்கு செல்லத் தயாராகியபோது விதிஷா கையில் இருந்து குழந்தை கீழே விழுந்தது என்று கூறப்படுகிறது. கீழே விழுகையில் அதன் தலை டிவி ஸ்டாண்டில் பட்டு பின்னர் தரையில் பட்டுள்ளது.

இதில் குழந்தையின் தலையில் அடிபட்டுள்ளது. உடனே அருகில் உள்ள மருத்துவமனைக்கு குழந்தையை கொண்டு சென்றுள்ளனர். பின்னர் மேல் சிகிச்சைக்காக குழந்தை வேறு ஒரு மருத்துவமனைக்கு அனுப்பி வைக்கப்பட்டுள்ளது.

குழந்தையை பரிசோதித்த மருத்துவர்கள் அதன் பெற்றோர்கள் தான் தாக்கியிருப்பார்களோ என்ற சந்தேகத்தில் குழந்தைகள் நல வாரிய அதிகாரிகளுக்கு தகவல் கொடுத்தனர். அவர்கள் வந்து குழந்தையை பெற்றோரிடம் இருந்து பிரித்து வளர்ப்பு தாயின் கவனிப்பில் விட்டுள்ளனர்.

இந்நிலையில் குழந்தையை தாங்கள் தாக்கவில்லை என்றும், தங்களை பற்றி தவறாக புரிந்து கொண்டு அதிகாரிகள் குழந்தையை எடுத்துச் சென்றுவிட்டதாகவும் ஆசிஷ் தெரிவித்துள்ளார். இந்த விஷயத்தில் தலையிட்டு குழந்தையை மீட்டுத் தருமாறு அவர் மத்திய வெளியுறவுத் துறை அமைச்சர் சுஷ்மா ஸ்வராஜுக்கு கடிதம் எழுதியுள்ளார்.

குழந்தையை அதிகாரிகள் எடுத்துச் சென்றதை ஜெய்பூரில் வசிக்கும் ஆசிஷின் சகோதரர் அபிஷேக் பாரீக் தெரிவித்துள்ளார்.

English summary

Child welfare officials have taken a 2-month old baby boy from an Indian couple and placed him in foster care after he was admitted in the hospital with severe head injuries.