திரிபுரா: பாஜகவுக்கு கம்யூனிஸ்டுகள் டஃப் பைட் : காங்- கூட்டணி ஒர்க் அவுட் ஆனது- எக்ஸிட் போல் டமால்!
திரிபுராவில் இடதுசாரிகள்- காங்கிரஸ் கூட்டணி பாஜகவுக்கு சவால் விடுக்கும் வகையில் கணிசமான இடங்களை கைப்பற்றி வருகிறது.
அகர்தலா: திரிபுரா சட்டசபை தேர்தலில் ஆளும் பாஜகவுக்கு கடும் போட்டியை தந்து கொண்டிருக்கிறது கம்யூனிஸ்டுகள் காங்கிரஸ் கூட்டணி. தேர்தலுக்கு பிந்தைய கருத்து கணிப்புகள் கம்யூனிஸ்டுகள்- காங்கிரஸ் கூட்டணிக்கு 3-வது இடம் கிடைக்கும் என கணித்ததை தேர்தல் வாக்கு எண்ணிக்கை முடிவுகள் தகர்த்து கொண்டிருக்கின்றன.
மேற்கு வங்கம் எப்படி ஒருகாலத்தில் இடதுசாரிகள் கோட்டையாக இருந்ததோ அதேபோல திரிபுராவும் இருந்தது. திரிபுராவில் 25 ஆண்டுகள் இடதுசாரிகள் ஆட்சிதான். திரிபுராவில் இடதுசாரிகள் ஆளும் கட்சி; காங்கிரஸ் எதிர்க்கட்சி.
கடந்த 2018 சட்டசபை தேர்தலுக்கு முன்புவரை திரிபுராவில் பாஜக என்பதே இல்லாத நிலை. ஆனால் காங்கிரஸில் கணிசமானோர் அப்படியே பாஜகவுக்கு தாவியதால் அக்கட்சி உயிர்பெற்றுவிட்டது. 2018 தேர்தலில் இடதுசாரிகளை வீழ்த்தி பாஜக முதல் முறையாக ஆட்சியைக் கைப்பற்றியது. பாஜகவிடம் இடதுசாரிகள் தங்களது எஃகு கோட்டையை பறிகொடுத்தது மிகப் பெரும் பின்னடைவாகும்.
இதனால் இந்த தேர்தலில் காலந்தோறும் எதிரியாக இருந்த காங்கிரஸுடன் இடதுசாரி கட்சிகள் கை கோர்த்தன. பாஜகவை வீழ்த்த இடதுசாரிகள், காங்கிரஸ் கை கோர்த்த நிலையில் புதிய வரவாக திர்ப்ரா மோத்தா கட்சி களமிறங்கியது. இதனால் திரிபுரா மாநிலத்தில் வலிமையான மும்முனைப் போட்டி உருவானது.
திரிபுரா தேர்தல் தொடர்பான தேர்தலுக்கு முந்தைய, பிந்தைய கருத்து கணிப்புகள் பெரும்பாலும், ஆளும் பாஜக ஆட்சியைத் தக்க வைக்கும்; 2-வது இடம் அகன்ற திப்ராலாந்து தனி மாநில கோரிக்கையை வலியுறுத்தும் திப்ரா மோதாவுக்குதான் கிடைக்கும். இடதுசாரிகள்- காங்கிரஸ் கூட்டணிக்கு 3-வது இடமே கிடைக்கும் என கணித்தன.
இந்நிலையில் இன்று காலை 8 மணி முதல் திரிபுராவில் வாக்குகள் எண்ணப்பட்டு வருகின்றன. இந்த வாக்கு எண்ணிக்கையில் தொடக்கம் முதலே பாஜக கூட்டணி முன்னிலையில்தான் இருந்து வருகிறது. முதலில் சிறிது நேரம் திப்ரா மோதா 2-வது இடத்தில் இருந்தது. பின்னர் இடதுசாரிகள்- காங்கிஅஸ் கூட்டணி 2-வது இடத்துக்கு முன்னேறியது. தற்போதைய நிலையில் பாஜக 30 இடங்களிலும் இடதுசாரிகள் காங்கிரஸ் கூட்டணி 19 இடங்களிலும் திப்ரா மோதா 11 இடங்களிலும் முன்னணியில் உள்ளன. இம்மாநிலத்தில் ஆட்சி அமைக்க தேவையான பெரும்பான்மை இடங்கள் 31.
அத்தனை கருத்து கணிப்புகளும் இடதுசாரிகள்- காங்கிரஸ் கூட்டணிக்கு 3-வது இடம் என அடித்து ஆரூடம் கூறின. ஆனால் வாக்கு எண்ணிக்கை முடிவுகளோ ஆரூடங்களை தகர்த்து இடதுசாரிகள்- காங்கிரஸின் விஸ்வரூபத்தை உறுதி செய்து கொண்டிருக்கின்றன.
Click it and Unblock the Notifications
Sign in with Google