ஓஹோ கதை இப்படி போகுதா? லாலுவின் ஆர்ஜேடியுடன் ஜேடியூவை இணைக்கிறாரா நிதிஷ்குமார்? பற்ற வைக்கும் பாஜக!

பாட்னா: பீகார் முதல்வர் நிதிஷ்குமார் தமது ஐக்கிய ஜனதா தளம் கட்சியை (ஜேடியூ) லாலு பிரசாத் யாதவின் ராஷ்டிரிய ஜனதா தளம் கட்சியுடன் விரைவில் இணைத்துவிடுவார் என மத்திய அமைச்சரும் பாஜக மூத்த தலைவர்களில் ஒருவருமான கிரிராஜ் சிங் தெரிவித்திருக்கிறார். ஆனால் லாலுவின் மகனும் பீகார் துணை முதல்வருமான தேஜஸ்வி யாதவ் இதனை திட்டவட்டமாக மறுத்துள்ளார்.

"இந்தியா" கூட்டணியின் பிரதமர் வேட்பாளராக நிதிஷ்குமாரை முன்னிறுத்த வேண்டும் என்கிறது ஜேடியூ. இதற்கு லாலு பிரசாத் யாதவின் ஆர்ஜேடி ஆதரவளிக்கிறது. பீகாரை சேர்ந்த ஒருவரை பிரதமர் வேட்பாளராக "இந்தியா" கூட்டணி முன்னிறுத்த வேண்டும் என்பது இவர்களது அஜெண்டா.

ஆனால் நிதிஷ்- லாலு இரட்டையரின் இந்த அஜெண்டாவை உடைக்கும் வகையில் இந்தியா கூட்டணியின் டெல்லி ஆலோசனைக் கூட்டத்தில் தலித் சமூகத்தைச் சேர்ந்தவரான அகில இந்திய காங்கிரஸ் கமிட்டித் தலைவரான மல்லிகார்ஜூன கார்கேவை பிரதமர் வேட்பாளராக பரிந்துரைத்தார் மேற்கு வங்க முதல்வர் மமதா பானர்ஜி. இதற்கு டெல்லி முதல்வர் அரவிந்த் கெஜ்ரிவால் ஆதரவு தெரிவித்தார்.

இதனால் நிதிஷ்குமாரும் லாலு பிரசாத் யாதவும் கொந்தளித்துப் போயினர். அத்துடன் இந்தியா கூட்டணி கூட்டத்தில் இருந்து வெளியேறியும்விட்டனர். இதனால் நிதிஷ்குமார் அடுத்து என்ன செய்யப் போகிறார்? என்கிற கேள்வி எழுந்துள்ளது. இப்பின்னணியில் வரும் 29-ந் தேதி ஜேடியூவின் தேசிய கவுன்சில் கூட்டத்தைக் கூட்டியுள்ளார் நிதிஷ்குமார். இந்தியா கூட்டணிக்கு நிபந்தனைகளை ஏதேனும் இந்த கூட்டத்தில் நிதிஷ்குமார் முன்வைக்கலாம் என கூறப்படுகிறது.

இன்னொரு பக்கம், லோக்சபா தேர்தலை முன்வைத்து நிதிஷ்குமாரின் ஜேடியூவும் லாலுவின் ஆர்ஜேடியும் ஒரே கட்சியாக இணையப் போகிறது. இந்த தகவல் நம்பத்தகுந்த வட்டாரங்களில் இருந்தே கிடைத்திருக்கிறது. பீகார் அரசியலில் இது முக்கியமான மாற்றம் என கொளுத்திப் போட்டிருக்கிறார் மத்திய அமைச்சர் கிரிராஜ் சிங்.

ஆனால் இதனை லாலுவின் மகனும் பீகார் துணை முதல்வருமான தேஜஸ்வி யாதவ் திட்டவட்டமாக மறுத்துள்ளார். மேலும் சிலர் தாங்கள் வெளிப்படுத்த விரும்பும் கருத்தை மற்றவர்கள் மூலமாக வரவழைக்க ஆசைப்படுகின்றனர். இதெல்லாம் நடக்காது. "இந்தியா' கூட்டணியில் எந்த ஒரு பிரச்சனையுமே இல்லை என விளக்கம் தந்துள்ளார் தேஜஸ்வி யாதவ்.

English summary

Union Minister Giriraj has claimed JD(U) will merge with RJD soon.