தமிழ்நாட்டைத் தொடர்ந்து நீட் தேர்வுக்கு எதிராக மே.வங்க சட்டசபையில் தீர்மானம் நிறைவேற்றம்!

Updated: Wednesday, July 24, 2024, 15:42 [IST]

Subscribe to Oneindia Tamil

கொல்கத்தா: தமிழ்நாட்டைத் தொடர்ந்து நீட் நுழைவுத் தேர்வுக்கு எதிராக மேற்கு வங்க மாநில சட்டசபையில் இன்று ஒருமனதாக தீர்மானம் நிறைவேற்றப்பட்டது. மேலும் மேற்கு வங்க மாநில அரசே நீட் நுழைவுத் தேர்வு அறிமுகத்துக்கு முன்னர் நடத்திய பொது நுழைவுத் தேர்வை நடத்த அனுமதிக்க வேண்டும் என்றும் அம்மாநில சட்டசபையில் இன்று நிறைவேற்றப்பட்ட தீர்மானம் வலியுறுத்தி உள்ளது.

இளநிலை மருத்துவ படிப்புகளுக்கான நீட் நுழைவுத் தேர்வை தமிழ்நாடு அரசு தொடக்கம் முதலே எதிர்த்து வருகிறது. நீட் நுழைவுத் தேர்வில் தமிழ்நாட்டுக்கு விலக்கும் பெறப்பட்டிருந்தது. ஆனால் உச்சநீதிமன்றத்தின் தீர்ப்பால் அனைத்து மாநிலங்களும் நீட் நுழைவுத் தேர்வை நடத்த வேண்டிய கட்டாயம் ஏற்பட்டது.

ஆனாலும் தமிழ்நாட்டுக்கு நீட் தேர்வில் இருந்து விலக்கு அளிக்க கோரி தமிழ்நாடு சட்டசபையில் தொடர்ச்சியாக தீர்மானங்கள் நிறைவேற்றப்பட்டு மத்திய அரசுக்கு அனுப்பி வைக்கப்படுகின்றன. ஆனாலும் இந்த தீர்மானங்களை கிடப்பில்தான் மத்திய அரசு போட்டு வைத்துள்ளது.

இந்த நிலையில் நடப்பாண்டில் நடத்தப்பட்ட நீட் தேர்வில் ஏராளமான முறைகேடுகள் பெரும் அதிர்ச்சியை ஏற்படுத்தின. நீட் வினாத்தாள் விற்பனை, ஆள் மாறாட்டம் , நீட் தேர்வு மையங்களே நீட் முறைகேடுகளை முன்னெடுத்தது என அடுத்தடுத்த அதிர்ச்சி தகவல்கள் வெளியாகின. நீட் தேர்வை நடத்திய தேசியத் தேர்வு முகமையும் சில ஆயிரம் மாணவர்களுக்கு கருணை மதிப்பெண் வழங்கியதும் சர்ச்சையானது.

இதனையடுத்து நாடு முழுவதுமே நீட் தேர்வுக்கு எதிராக பெரும் போராட்டங்கள் வெடித்தன. நீட் முறைகேடுகளை முன்வைத்து நாடாளுமன்றத்தை இந்தியா கூட்டணி கட்சிகள் முடக்கின. டெல்லியில் போராட்டங்கள் நடைபெற்றன. தமிழ்நாடு சட்டசபையில் மீண்டும் நீட் தேர்வுக்கு எதிராக தீர்மானம் நிறைவேற்றப்பட்டது.

மகாராஷ்டிரா, கர்நாடகா, மேற்கு வங்க மாநிலங்களும் நீட் தேர்வை ரத்து செய்ய கோரின. கர்நாடகாவில் ஆளும் காங்கிரஸ் அரசு நீட் தேர்வுக்கு எதிரான தீர்மானம் கொண்டு வரும் மசோதாவுக்கு அமைச்சரவை ஒப்புதலைப் பெற்றது.

தற்போது மேற்கு வங்க மாநில சட்டசபையிலும் நீட் தேர்வுக்கு எதிராக தீர்மானம் நிறைவேற்றப்பட்டது. மேலும் நீட் தேர்வு அறிமுகப்படுத்தப்படுவதற்கு முன்னர் மேற்கு வங்க மாநில அரசே நடத்திய பொது நுழைவுத் தேர்வை மீண்டும் நடத்த வேண்டும் எனவும் மேற்கு வங்க சட்டசபையில் நிறைவேற்றப்பட்ட தீர்மானம் வலியுறுத்தி உள்ளது.