2 சீட் தானா? பிச்சையா? மோடிக்கு சேவை செய்யும் மமதா..வெளுக்கிறது காங்.- "இந்தியா" கூட்டணி கதி?
கொல்கத்தா: பிரதமர் மோடிக்கு சேவை செய்து கொண்டிருக்கிறார் திரிணாமுல் காங்கிரஸ் தலைவரும் மேற்கு வங்க முதல்வருமான மமதா பானர்ஜி. மேற்கு வங்கத்தில் மமதாவின் ஆதரவு இல்லாமலேயே காங்கிரஸ் போட்டியிட முடியும் என்றெல்லாம் வெளுத்தெடுத்திருக்கிறார் மூத்த காங்கிரஸ் தலைவர் ஆதிர் ரஞ்சன் சவுத்ரி.
"இந்தியா" கூட்டணியில் காங்கிரஸ், இடதுசாரிகள், திரிணாமுல் காங்கிரஸ் உள்ளிட்டவை இடம் பெற்றுள்ளன. "இந்தியா" கூட்டணியில் தற்போது தொகுதி பங்கீட்டு பேச்சுவார்த்தை நடைபெற்று வருகிறது.
மேற்கு வங்க மாநிலத்தில் "இந்தியா" கூட்டணியில் காங்கிரஸ், திரிணாமுல் காங்கிரஸ் மட்டுமே இடம் பெற முடியும். இந்த அணியில் இடதுசாரிகள் இணைய வாய்ப்பில்லை. மேலும் காங்கிரஸ் கட்சிக்கு அதிகபட்சமாக 2 தொகுதிகள்தான் ஒதுக்க முடியும் என முதல்வர் மமதா பானர்ஜி திட்டவட்டமாகவும் கூறி வருகிறார். இது காங்கிரஸை கடுமையாக கொந்தளிக்க வைத்திருக்கிறது.
இது தொடர்பாக மேற்கு வங்க காங்கிரஸ் தலைவர் ஆதிர் ரஞ்சன் சவுத்ரி கூறியதாவது: நாங்கள் ஒன்றும் மமதாவிடம் தொகுதி பிச்சை கேட்கவில்லை. மமதா பானர்ஜியின் கருணை எங்களுக்கு தேவையே இல்லை. எங்களது சொந்த பலத்தில் எங்களால் தேர்தலை சந்திக்கவும் முடியும். உண்மையிலேயே மமதா பானர்ஜி, காங்கிரஸுடனான கூட்டணியை விரும்பவே இல்லை. பிரதமர் மோடிக்கு சேவை செய்வதில்தான் அவர் பிஸியாக இருக்கிறார். இவ்வாறு ஆதிர் ரஞ்சன் சவுத்ரி கூறினார்.
முன்னதாக, காங்கிரஸ் கமிட்டியின் தலைவர் மல்லிகார்ஜூன கார்கேவை "இந்தியா" கூட்டணியின் பிரதமர் வேட்பாளராக டெல்லி ஆலோசனைக் கூட்டத்தில் மமதா பானர்ஜி பரிந்துரைத்தார். இதனை டெல்லி முதல்வர் அரவிந்த் கெஜ்ரிவாலும் ஆதரித்தார். இந்தியா கூட்டணியின் எந்த கட்சியும் இதற்கு எதிர்ப்பு தெரிவிக்கவில்லை. மல்லிகார்ஜூன கார்கே தலித் என்பதால் தனித் தொகுதிகளில் தாக்கத்தை ஏற்படுத்த முடியும் என்பது மமதாவின் கணக்கு. ஆனால் காங்கிரஸ் மேலிடம் இதனை ரசிக்கவில்லை என கூறப்படுகிறது. இதேபோல தொகுதிப் பங்கீட்டை டிசம்பர் 31-ந் தேதிக்குள் முடிக்க வேண்டும் என வலியுறுத்தினார் மமதா. இதனையும் காங்கிரஸ் ஏற்கவில்லை. இந்த நிலையில் மமதா பானர்ஜியை மிக கடுமையாக காங்கிரஸ் விமர்சித்திருக்கிறது. இத்தகைய நிலைப்பாடுகள் தொடர்ந்தால் "இந்தியா" கூட்டணிக்கு விரைவிலேயே காங்கிரஸ் மூடு விழா காணும் என்கின்றனர் அரசியல் பார்வையாளர்கள்.
Click it and Unblock the Notifications
Sign in with Google