வயசு 62, என்னோட லவ்வர்.. எங்காச்சும் பார்த்தீங்களா.. வலை வீசி தேடும் 29 வயது சீன இளைஞர்!

பீஜிங்: இணையதளத்தில் சந்தித்த தனது 62 வயது காதலியை தேடி, வேலையை ராஜினாமா செய்து விட்டு ஊர் ஊராக அலைந்து வருகிறார் 29 வயது சீன இளைஞர் ஒருவர்.

முகம் பார்க்காமல் இணையதளத்தில் காதலிப்பவர்கள் உண்டு. அந்த வகையில், சீனாவைச் சேர்ந்த சூ ஜிங் என்ற இளைஞருக்கு, கடந்த ஓராண்டிற்கு முன் இணையதளம் மூலமாக 62 வயது பெண் ஒருவருடன் நட்பு ஏற்பட்டது.

இருவருக்கும் இடையே பெரிய அளவில் வயது வித்தியாசம் இருந்தாலும் அதை பற்றியெல்லாம் யோசிக்காமல் அப்பெண்ணை தீவிரமாக காதலிக்க ஆரம்பித்தார் ஜிங்.

இந்நிலையில், சமீபத்தில் திடீரென ஜிங்கின் காதலி மாயமாகி விட்டாராம். எங்கு தேடியும் இன்னமும் அவர் கிடைக்கவில்லையாம்.

காதலியைத் தேடுவதற்காக தனது வேலையை ராஜிமானா செய்தார் ஜிங். பின்னர், காதலியைத் தேடி ஹீனான் மாகாணத்தில் உள்ள அவரது சொந்த ஊரான க்சியாங்டானுக்கு சென்றார். காதலியின் வீட்டையும் கண்டு பிடித்து விட்டார். ஆனால், அங்கு ஜிங்குக்கு அவமரியாதை தான் பரிசாக கிடைத்தது.

அப்பெண்ணின் மருமகன் வீட்டை விட்டு ஜிங்கை வெளியேற்றியதுடன், தனது மாமியார் பற்றி எந்த தகவலையும் கூற மறுத்துவிட்டார். இந்நிலையில் தனது தேடும் யுக்தியை மாற்றிய ஜிங், அப்பெண்ணின் முன்னாள் கணவரை தொடர்பு கொண்டார்.

அவரிடம் தனது காதலியை இருப்பிடம் ஏதும் தெரியுமா என்று ஜிங் கேட்டபோது, தங்களது விவாரத்து சான்றிதழை காண்பித்துள்ளார் அவர்.

தொடர்ந்து மனம் தளராத ஜிங், உள்ளூர் பத்திரிகைகளில் விளம்பரம் கொடுத்து விட்டு தனது காதலிக்காக காத்திருக்கிறார்.

தனது காதலி குறித்து ஜிங் கூறுகையில், ‘62 வயதை எட்டியவளாக இருந்தாலும் எனது காதலி 40 வயதுடையவள் போல் இருப்பாள். அவள் தான் என் முதல் பெண் தோழி. அவள் தான் என் முதல் காதலி. ஒவ்வொரு நாள் இரவும் பகலும் அவளை பற்றியே யோசிப்பேன்' என்கிறார்.

English summary

A 29-year-old man fell in love with a 62-year-old woman and was devastated when she disappeared. The 29-year-old man recently quit his job in Yunnan, China, to find his 62-year-old girlfriend.