"மேக் இன் இந்தியா"... வயிறு கலங்கிய சீனா.. "மேட் இன் சீனா" பிரசாரத்தைக் கையில் எடுத்தது!
பெய்ஜிங்: இந்தியாவில் மோடி அரசு மேக் இன் இந்தியா என்ற பிரசாரத்தை இன்று தொடங்கியுள்ள நிலையில், சீனாவும் அதிரடியாக மேட் இன் சீனா திட்டத்தை கையில் எடுத்துள்ளது.
தொழில்துறையினருக்கு ஏகப்பட்ட வரிச் சலுகைகளையும் சீன அரசு அறிவித்துள்ளது. இந்தியாவின் மேக் இன் இந்தியா பிரசாரம் தொடங்கியுள்ள அதே நேரத்தில் சீனாவும் அதே போல ஒரு திட்டத்தை அறிவித்திருப்பது குறிப்பிடத்தக்கது.
உயர் தொழில்நுட்ப இறக்குமதிகளுக்கு சீனா தற்போது முக்கியத்துவமும், ஆதரவும் தரப் போகிறதாம். அதேபோல மேட் இன் சீனா பொருட்களின் தரத்தை உயர்த்தும் வகையில் ஆய்வு மற்றும் வளர்ச்சிப் பணிகளுக்கு அதிக கவனம் கொடுக்கவுள்ளனராம்.
வரிச் சலுகைகள்
இந்தத் திட்டத்தின் ஒரு அம்சமாக, தொழில் நிறுவனங்கள் தங்களது உற்பத்தி சாதனங்களையும், வளர்ச்சி ஆய்வுக்கான முயற்சிகளையும் மேம்படுத்த வரிச் சலுகைகளை சீன அரசு வழங்கும்.
ஜனவரி 1ம் தேதிக்குப் பிறகு
ஜனவரி 1ம் தேதிக்குப் பிறகு வாங்கப்பட்ட புதிய சாதனங்கள் உள்ளிட்டவற்றை மேம்படுத்த பல்வேறு வரிச் சலுகைகளும் நிதியுதவியும் சீன அரசால் வழங்கப்படும்.
பிரதமர் தலைமையிலான குழு முடிவு
இந்த முக்கிய முடிவுகளை பிரதமர் லீ கிகியாங் தலைமையில் நடந்த அமைச்சரவைக் குழு எடுத்து அறிவித்துள்ளது.
எந்தெந்த துறைகளுக்குச் சலுகை
விமானப் போக்குவரத்து, பயோ மெடிசின் உற்பத்தி, ரயில்வே, கப்பல் துறை, மின்னணுத் துறை, கம்ப்யூட்டர், தொலைத் தொடர்பு, சாப்ட்வேர் உள்ளிட்ட பிரிவுகளுக்கு இந்த வரிச் சலுகைகள் அறிவிக்கப்பட்டுள்ளனவாம்.
சீனாவிலும் பரவிய மேக் இன் இந்தியா பிரசாரம்
இன்று பிரதமர் நரேந்திர மோடி தொடங்கி வைத்த மேக் இன் இந்தியா பிரசாரத் திட்டத்தை சீனாவின் ஷாங்காய், குவாங்ஷோ, ஹாங்காங் ஆகிய பகுதிகளில் உள்ள இந்தியத் தூதரகங்களில் நேரடியாக ஒளிபரப்பினர் என்பது குறிப்பிடத்தக்கது.
சுதாரிக்கும் சீனா
இந்தியாவின் மேக் இன் இந்தியா திட்டத்தால் தனக்குப் பாதிப்பு வரலாமோ என்று சீனா அஞ்சுகிறது. இதையடுத்தே சீனத் தயாரிப்புகளை தரமுடையதாக மாற்ற அது களம் இறங்கியுள்ளதாக கூறப்படுகிறது.
Click it and Unblock the Notifications
Sign in with Google