தம்மாத்தூண்டு "கோக் கேனை" வைத்து ரஷ்ய விமானத்தைத் தகர்த்ததா ஐஎஸ்ஐஎஸ்... ??

Updated: Thursday, November 19, 2015, 13:54 [IST]

Subscribe to Oneindia Tamil

வாஷிங்டன்: ஒரு சாதாரண சோடா கேனுக்குள் வெடிகுண்டு வைத்து அதைக் கொணடு ரஷ்ய விமானத்தைத் தகர்த்ததாக ஐஎஸ்ஐஎஸ் தீவிரவாதிகள் கூறியுள்ளனர். இதுதொடர்பாக படத்தையும் அவர் போட்டுள்ளனர்.

ஆனால் இவ்வளவு சிறிய சோடா கேனில் குண்டை வைத்து ஒரு பெரிய விமானத்தை தகர்க்க முடியுமா, சாத்தியம் உள்ளதா என்பது குறித்து நிபுணர்கள் ஆய்வில் இறங்கியுள்ளனர்.

அந்த சோடா கேன், சாதாரண பெப்சி, கோக் கேன் போல உள்ளது. அந்த கேனுக்குப் பக்கத்தில் வெடிகுண்டுகளை இணைப்பதற்கான வயர்களையும் போட்டு புகைப்படம் எடுத்து வெளியிட்டுள்ளது ஐஎஸ் அமைப்பு. இதுதொடர்பாக நியூயார்க் டைம்ஸ் செய்தி ஒன்றை வெளியிட்டுள்ளது.

சினாய் தீபகற்பத்தில்

கடந்த மாதம் ரஷ்ய பயணிகள் விமானம் ஒன்று சினாய் தீபகற்பப் பகுதியில் தகர்க்கப்பட்டது. அதில் இருந்த 224 பேரும் பரிதாபமாக உயிரிழந்தனர். இது குறித்து பல்வேறு தகவல்கள் வெளியான நிலையில் தாங்கள்தான் இதைத் தகர்த்ததாக ஐஎஸ் தீவிரவாதிகள் கூறியிருந்தனர்.

புதிய தகவல்

இந்த நிலையில் எப்படி விமானத்தைத் தகர்த்தோம் என்பது குறித்த புதிய தகவல் ஒன்றை ஐஎஸ் அமைப்பு தனது ஆங்கில இதழான டபிக்கில் தெரிவித்துள்ளது. அதில் ஒரு சோடா கேனையும், சில வயர்களையும் போட்டு, இதேபோன்ற குண்டு கொண்டுதான், ரஷ்ய விமானத்தைத் தகர்த்ததாக அவர்கள் கூறியுள்ளனர்.

டுபாக்கூர் தகவலா

இதுகுறித்து வெடிகுண்டு நிபுணர்கள் சிலர் கருத்து தெரிவிக்கையில், இது அனைவரையும் திசை திருப்பும் நோக்கத்துடன் வெளியிடப்பட்ட தகவலாக தெரிகிறது. இந்த சின்ன சோடா கேனை வைத்து ஒரு பெரிய விமானத்தைத் தகர்க்க முடியும் என்பது சந்தேகத்திற்குரியது என்று கூறியுள்ளனர்.

திட வெடிகுண்டாக இருக்கலாம்

இருப்பினும் இவர்கள் போட்டுள்ள புகைப்படத்தை வைத்து சில நிபுணர்கள் கருத்து தெரிவித்துள்ளனர். இது வெடிகுண்டு என்பதில் சந்தேகம் இல்லை. மிகவும் நுனுக்கமாக இதை தயாரித்துள்ளதாக தெரிகிறது. மேலும் இது திட வெடிகுண்டாக இருக்கலாம். திரவ வெடிகுண்டாக இருக்க வாய்ப்பில்லை.

மிகவும் அழுத்தமாக

இந்த சோடா கேனை மட்டும் வைத்து முழுமையான முடிவுக்கு வர முடியாது. அதேசமயம், இந்த சோடா கேனுக்குள் எவ்வளவு அதிக வெடிபொருட்களை திணிக்க முடிகிறதோ அவ்வளவு திணித்து வைத்து பெரும் சேதத்தை ஏற்படுத்த முயன்றிருக்கலாம் என்று நிபுணர்கள் கூறுகின்றனர்.

விமானம் தகர்ந்திருக்க வாய்ப்பில்லை

அதேசமயம், இந்த சோடா கேன் வெடிகுண்டால் விமானம் தகர்ந்திருக்க வாய்ப்பில்லை. அதேசமயம், இந்த திடீர் தாக்குதலால் அதிக வேகத்தில் சென்று கொண்டிருந்த விமானம் சேதத்தை சந்தித்து நிலைகுலைந்து தாறுமாறாக பறந்து கீழே விழுந்திருக்கலாம் என்று கருதப்படுகிறது.