9 கோடி ஆண்டுகளுக்கு முன் வாழ்ந்த முதலை.. வயிற்றுக்குள் பார்த்தால்.. ஆ.. 'ஷாக்' ஆன ஆராய்ச்சியாளர்கள்

Updated: Tuesday, November 22, 2022, 21:26 [IST]

Subscribe to Oneindia Tamil

கான்பெர்ரா: 9 கோடி ஆண்டுகளுக்கு முன்பு வாழ்ந்த முதலையின் எலும்புக் கூட்டை கண்டுபிடித்த அகழ்வாராய்ச்சியாளர்கள் அதன் வயிற்றுக்குள் டைனோசரின் எலும்புப் படிமங்களை பார்த்து ஆச்சரியத்தில் மூழ்கியுள்ளனர்.

இறப்பதற்கு முன்பு ஒரு சிறிய அளவிலான டைனோசரை அந்த முதலை உணவாக்கி இருக்கக்கூடும் என ஆராய்ச்சியாளர்கள் தெரிவித்துள்ளனர்.

மேலும், பல கோடி ஆண்டுகளுக்கு முன்பு வாழ்ந்த முதலை வகைகளிலேயே இது வித்தியாசமானது என்றும், இந்த எலும்புக்கூட்டை ஆராய்ச்சி செய்தால் பல ஆச்சரியமான தகவல்கள் கிடைக்கும் எனவும் ஆராய்ச்சியாளர்கள் தெரிவித்துள்ளனர்.

மலைக்க வைக்கும் கண்டுபிடிப்புகள்..

உலகில் மனிதர்கள் தோன்றுவதற்கு முன்பே லட்சக்கணக்கான உயிரினங்கள் வாழ்ந்திருக்கின்றன. அவற்றில் பெரும்பாலான உயிரினங்கள் இன்று அழிந்து போய்விட்டன. சில உயிரினங்கள் பரிமாண வளர்ச்சி அடைந்து நம் மத்தியில் இருக்கின்றன. இதுபோன்று பல லட்சம் அல்லது கோடி ஆண்டுகளுக்கு முன்பு வாழ்ந்த உயிரினங்களை நமக்கு அறிமுகப்படுத்தி ஆச்சரியத்தில் ஆழ்த்துவது அகழ்வாராய்ச்சிகள் தான். இப்படி உலகின் பல இடங்களில் நடைபெற்று வரும் அகழ்வாராய்ச்சிகளில் அவ்வப்போது உலகையே திரும்பிப் பார்க்கும் கண்டுபிடிப்புகள் கிடைத்துக் கொண்டுதான் இருக்கின்றன. அப்படியொரு கண்டுபிடிப்பு தான் ஆஸ்திரேலியாவில் நடந்துள்ளது.

ஆஸ்திரேலியாவில் நடந்த அகழ்வாய்வு..

ஆஸ்திரேலியாவின் குயின்ஸ்லாந்து நகரில் கடந்த 2 ஆண்டுகளுக்கும் மேலாக அகழ்வாராய்ச்சி நடைபெற்று வருகிறது. அந்த இடத்தில் பல கோடி ஆண்டுகளுக்கு முன்பு கடல் இருந்ததால் அங்கு பழங்காலத்தில் கடலில் வாழ்ந்த உயிரினங்களின் எலும்புகள் அல்லது படிமங்கள் கிடைக்கும் என்பதால் அங்கு அகழ்வாராய்ச்சி நடந்து வருகிறது. அதன்படியே பல பழங்கால மீன்கள் மற்றும் உயிரினங்களின் எலும்புப் படிமங்களை ஆராய்ச்சியாளர்கள் சேகரித்து வந்தனர்.

9 கோடி ஆண்டுகளுக்கு முன்..

அப்படி நடந்த ஆராய்ச்சியில்தான் 9 கோடி ஆண்டுகளுக்கு முன்பு வாழ்ந்த ஒரு ராட்சத முதலையின் எலும்புக் கூட்டை ஆராய்ச்சியாளர்கள் கண்டெடுத்தனர். இதுவரை நடைபெற்ற அகழ்வாராய்ச்சிகளில் கிடைக்கப்பெறாத முதலையாக இது இருந்ததை ஆராய்ச்சியாளர்கள் கண்டுபிடித்தனர். மேலும், 10 அடி நீளமுள்ள அந்த முதலையின் வயிற்றுக்குள் மற்றொரு விலங்கின் எலும்புப் படிமங்களும் இருந்தன. இதையடுத்து, அந்த எலும்பு படிமங்களை கம்ப்யூட்டர், சிடி ஸ்கேன் கொண்டு ஆராய்ச்சி செய்த போது அது டைனோசரின் எலும்பு என்பது தெரியவந்தது.

ஆச்சரியத்தில் ஆராய்ச்சியாளர்கள்..

அதாவது இறப்பதற்கு முன்பு ஒரு டைனோசர் குட்டியை அந்த முதலை சாப்பிட்டிருக்க வேண்டும் என ஆராய்ச்சியாளர்கள் தெரிவித்துள்ளனர். பின்னர் சிறிது நேரத்தில் அந்த முதலையும் கொல்லப்பட்டிருக்கிறது. ஆனால், எந்த விலங்கு அந்த முதலையை கொன்றது எனத் தெரியவில்லை. தோராயமாக, அந்த குட்டி டைனோசரின் தாய் அந்த முதலையை கொன்றிருக்கலாம் என அகழ்வாராய்ச்சியாளர்கள் தெரிவிக்கின்றனர். ஏனெனில், கண்டெடுக்கப்பட்ட அந்த முதலையின் எலும்புக் கூட்டில் வால் இல்லை. எனவே, குட்டி டைனோசரை சாப்பிட்ட பின்னர் நடந்த மோதலில் முதலை இறந்திருக்கும் என ஆராய்ச்சியாளர்கள் கருதுகின்றனர். இந்த முதலையின் எலும்புக் கூடு தற்போது ஆஸ்திரேலியாவில் உள்ள 'ஏஜ் ஆஃப் டைனோசர்ஸ்' அருங்காட்சியகத்தில் வைக்கப்பட்டுள்ளது.