மங்கள்யானின் வெற்றி ஆசியாவின் பெருமை.. சீனா அதிரடி புகழாரம்!

பெய்ஜிங்: இந்தியாவின் மங்கள்யான் விண்கலத்தின் வெற்றிக்கு சீனா புகழாரம் சூட்டியுள்ளது. இது இந்தியாவின் பெருமை மட்டுமல்ல, ஆசியாவின் பெருமை என்றும் அது வர்ணித்துள்ளது.

மனித குலத்தின் மிகப் பெரிய வெற்றிகளில் ஒன்றாகவும் இது பதியப்படும் என்றும் சீனா பாராட்டு தெரிவித்துள்ளது.

இதுகுறித்து சீன வெளியுறவுத்துறை செய்தித் தொடர்பாளர் ஹுவா சுன்யிங் பெய்ஜிங்கில் செய்தியாளர்களிடம் பேசுகையில், இந்தியாவின் செவ்வாய் கிரக ஆய்வு செயற்கைக் கோளான மங்கள்யான் செவ்வாய் கிரகத்தின் சுற்றுப் பாதையில் நுழைந்திருப்பது குறித்த செய்தி அறிந்தோம். இதற்காக இந்தியாவை வாழ்த்துகிறோம்.

இது இந்தியாவுக்குப் பெருமை தரும் நிகழ்வு. அதேபோல ஆசியாவுக்கும் இது பெருமையான ஒரு நிகழ்வாகும். மனித குலத்தின் மிகப் பெரிய வெற்றிகளில் ஒன்றாக இதை வரலாறு பதிவு செய்யும். இந்தியாவை இதற்காகவும் பாராட்டுகிறோம்.

சீனா எப்போதுமே பூமியைத் தாண்டிய அண்டவெளி ஆய்வுகளில் பிற நாடுகளுடன் ஒத்துழைத்தே செயல்பட்டு வந்துள்ளது. எதிர்காலத்திலும் இது தொடரும். உலக நாடுகளுடன் இணைந்து செயல்படுவதை எப்போதுமே சீனா விரும்பி வந்துள்ளது என்றார் அவர்.

சீனா இதற்கு முன்பு சந்திரனுக்கு விண்கலத்தை அனுப்பியுள்ளது. அதேபோல விண்வெளிக்கும் விண்வெளி வீரரைக் கூட அனுப்பியுள்ளது. ஆனால் செவ்வாய் கிரக ஆய்வுகளில்தான் அது இதுவரை வெற்றி பெற்றதில்லை என்பது குறிப்பிடத்தக்கது.

கடந்த 2011ம் ஆண்டு சீனாவின் யிங்குவோ 1 என்ற செவ்வாய் கிரக ஆய்வு விண்கலத்தை சுமந்து சென்ற ரஷ்ய ராக்கெட் பாதியிலேயே எரிந்து போனது நினைவிருக்கலாம்.

English summary

China has congratulated India for its successful Mars mission saying that it was not only a proud achievement for the country and Asia but also a "landmark progress" in mankind's exploration of outer space. "We have seen the report and congratulate India on the Mars satellite entering the orbit successfully," Chinese Foreign Ministry Spokesperson Hua Chunying told a media briefing here while replying to a question on the successful sojourn of India's Mars Orbiter Mission (MOM) spacecraft 'Mangalyaan'.