தைவான் வான்பரப்பில் அத்துமீறி பறந்த சீனா போர் விமானங்கள்-எச்சரிக்கையுடன் 4 யு.எஸ். போர்க்கப்பல்கள்!

Updated: Tuesday, August 2, 2022, 16:15 [IST]

Subscribe to Oneindia Tamil

தைபே: தைவான் நீரிணைப் பகுதியில் சீனாவின் போர் விமானங்கள் அத்துமீறி பறந்ததால் தொடர்ந்து பதற்றம் அதிகரித்துள்ளது. அமெரிக்காவின் பிரதிநிதி நான்சி பெலோசி, தைவானுக்கு வருகை தர எதிர்ப்பு தெரிவித்து இத்தகைய அத்துமீறல்களை சீனா மேற்கொண்டு வருகிறது.

2-வது உலக மகா யுத்தத்துக்குப் பின்னர் சீனாவில் பயங்கர உள்நாட்டு போர் ஏற்பட்டது. இதில் மா சேதுங் தலைமையிலான கம்யூனிசப் படைகள் வெற்றி பெற்றது. சீனாவில் ஆட்சி அதிகாரத்தில் இருந்த குவாண்டமிங் எனப்படும் தேசியவாத அரசு தோல்வியைத் தழுவியது. இதனால் சீனாவை விட்டு வெளியேறி தைவான் நிலப் பரப்பில் சீனா குடியரசு ஆட்சியை அமைத்தனர்.

தனிநாடு தைவான்

தைவான், தனித்த இறையாண்மை கொண்ட ஒரு நாடாக அங்கீகரிக்கப்படுகிறது. ஆனால் சீனாவோ, தைவானும் எங்கள் நாட்டின் ஒரு பகுதி; எப்போது வேண்டுமானாலும் சீனாவின் ஒரு மாகாணமாக தைவானை இணைப்போம் என்கிறது. இதற்கு அமெரிக்கா உள்ளிட்ட நாடுகள் கடும் எதிர்ப்பு தெரிவித்து வருகின்றன.

தைவான் மீது ஆக்கிரமிப்பு முயற்சி?

உக்ரைன் மீதான ரஷ்யாவின் ஆக்கிரமிப்பு யுத்தம் தொடங்கிய நாள் முதலே, தைவான் மீதும் சீனா ஆக்கிரமிப்புப் போர் நடத்தும் என்றே கூறப்பட்டு வந்தது. சீனாவும் தைவானை அச்சுறுத்தும் வகையில் போர் விமானங்களை பறக்க விடுதல்; தைவான் அருகே போர் ஒத்திகையில் ஈடுபடுதல் என பல்வேறு நடவடிக்கைகளை மேற்கொண்டு வருகிறது. இதனை அமெரிக்கா உள்ளிட்ட நாடுகள் எதிர்க்கின்றன.

நான்சி வருகைக்கு எதிர்ப்பு

இந்நிலையில் அமெரிக்காவின் பிரதிநிதி நான்சி பெலோசி, தைவான் உள்ளிட்ட நாடுகளுக்கு பயணம் மேற்கொள்வதாக அறிவித்தார். இதற்கு சீனா கடும் எதிர்ப்பு தெரிவித்தது. இந்நிலையில் தைவான் வான்பரப்பில் இன்று சீனாவின் போர் விமானங்கள் இடைவிடாமல் பறந்தன. நான்சி பெலோசியின் வருகைக்கு எதிராகவே சீனாவின் போர் விமானங்கள் பறந்ததாக கூறப்படுகிறது.

அமெரிக்கா போர்க் கப்பல்கள்

சீனாவின் இந்த நடவடிக்கைக்கு பதிலடியாக, தைவானின் கிழக்குப் பகுதி கடற்பரப்பில் 4 அமெரிக்கா போர்க்கப்பல்கள் ரோந்து வந்தன. போர் விமானங்களை தாங்கிய இந்த போர்க்கப்பல்கள் வழக்கமான ரோந்து பணியில் ஈடுபடுத்தப்பட்டிருந்தன என்கின்றன அமெரிக்க தரப்பு வட்டாரங்கள். தைவானை முன்வைத்து சீனாவும் அமெரிக்காவும் ராணுவ பலத்தை காட்ட முயற்சிப்பதால் அப்பிராந்தியத்தில் பதற்றம் தொடருகிறது.