ஹைதி நிலநடுக்கம்.. பலி எண்ணிக்கை 1,419 ஆக உயர்வு.. எங்கும் மரண ஓலம்!

லேஸ் கேய்ஸ்: கரீபியன் கடலில் உள்ள ஹைதி தீவுகளில் கடந்த 14 ஆம் தேதி ஏற்பட்ட சக்தி வாய்ந்த நிலநடுக்கம் ஏற்பட்டதில் பலி எண்ணிக்கை 1,419 ஆக உயர்ந்துள்ளது.

கடந்த 14 ஆம் தேதி காலை ஹைதி பகுதியில் நிலநடுக்கம் ஏற்பட்டது. இது ரிக்டர் அளவுகோலில் 7.2 ஆக பதிவாகியிருந்தது. போர் அவு பிரின்ஸ் தலைநகரின் மேற்கே 125 கிமீட்டரை மையம் கொண்டு ஏற்பட்ட இந்த சக்திவாய்ந்த நிலநடுக்கத்தால் கடற்கரையோரம் உள்ள லேஸ் கேய்ஸ் நகரம் பெரும் சேதத்தை சந்தித்துள்ளது.

இந்த நிலநடுக்கத்தால் பல்லாயிரக்கணக்கானோர் வீடுகளை இழந்துள்ளனர். மருத்துவமனைகள், பள்ளிகள், தேவாலயங்கள், அலுவலகங்கள் என சேதம் அடைந்துவிட்டன. கட்டட இடிபாடுகளில் சிக்கி உயிரிழந்தோரின் எண்ணிக்கை 1,149 ஆக உயர்ந்துள்ளது. 14 ஆம் தேதி அன்று பலி எண்ணிக்கை 27 ஆக இருந்த நிலையில் தற்போது கடுமையாக உயர்ந்துள்ளது.

அது போல் தற்போதைய நிலையில் 6000 க்கும் மேற்பட்டோர் காயமடைந்துள்ளனர். மீட்பு பணிகள் மேலும் மேற்கொள்ளப்பட்டு வருவதால் பலி எண்ணிக்கை உயரும் என அஞ்சப்படுகிறது. மீட்கப்பட்டோரின் எண்ணிக்கையில் பலரது நிலை கவலைக்கிடமாக உள்ளது. பெரும்பாலான மருத்துவமனைகள் இடிந்துவிட்டதால் எஞ்சியுள்ள மருத்துவமனைகளில் மக்கள் கூட்டம் நிரம்பி வழிகிறது.

மருத்துவமனையில் உள்ள பிணவறையில் குளிர்சாதன பெட்டி கடந்த 3 மாதங்களாக வேலை செய்யவில்லை. இதையடுத்து சிறிய இடத்தில் 20 உடல்களை மருத்துவமனை நிர்வாகிகள் வைத்துள்ளனர். இந்த நிலையில் கனமழை, கடும் காற்று ஆகியவற்றால் மீட்பு பணிகளில் தொய்வு ஏற்பட்டுள்ளது. இந்த நிலநடுக்கத்தால் ஹைதி நகரமே நிலைகுலைந்துள்ளது.

English summary

Haiti Earthquake: Death toll increases to 1,419 and injured rises to 6000.