அமெரிக்க "காங்கிரஸில்" வைத்து காங்கிரஸுக்குக் கட்டையைக் கொடுத்த மோடி.. !
வாஷிங்டன்: அமெரிக்க நாடாளுமன்றத்தில் (காங்கிரஸ்) உரை நிகழ்த்திய பிரதமர் நரேந்திர மோடி, தனது ஜாலியான மற்றும் கேஷுவலான பேச்சால் உறுப்பினர்களைக் கவர்ந்து விட்டார். தொடர்ந்து கைதட்டியபடி மோடி பேச்சை கேட்டு ரசித்தனர் அமெரிக்க எம்.பிக்கள். பலமுறை எழுந்து நின்றும் அவர்கள் கரகோஷம் எழுப்பினர். மோடி தனது பேச்சின்போது காங்கிரஸ் கட்சிக்கும் கட்டையைக் கொடுக்கத் தவறவில்லை. இது அமெரிக்க எம்.பிக்களிடையே குபீர் சிரிப்பை வரவழைத்தது.
அமெரிக்காவுக்கு விஜயம் செய்த மோடி, அங்கு அதிபர் ஒபாமாவைச் சந்தித்துப் பேசினார். வர்த்தக பிரமுகர்களின் மாநாட்டில் கலந்து கொண்டார். அதன் பின்னர் அமெரிக்க நாடாளுமன்றமான காங்கிரஸில் உரை நிகழ்த்தினார். அவரது பேச்சுக்கு அமெரிக்க எம்.பிக்களிடையே பெரும் வரவேற்பு கிடைத்தது. தொடர்ந்து சிரித்தபடியும், கைதட்டியபடியும் மோடி பேச்சைக் கேட்டு ரசித்தனர்.
இரு நாடுகளின் வரலாறுகளையும் விவரித்துப் பேசிய மோடி ஆங்காங்கே நகைச்சுவையைக் கலந்தும் பேசியதால் அமெரிக்க எம்.பிக்கள் மோடி மீது "இம்ப்ரஸ்" ஆகி விட்டனர்.
மோடி பேச்சில் இழையோடிய நகைச்சுவையில் நம்ம ஊர் காங்கிரஸ் கட்சியும், ராஜ்யசபாவும் இடம் பெறத் தவறவில்லை. பெயரைக் கூறாமல் காங்கிரஸையும், எதிர்க்கட்சிகளையும் வாரி விட்டுப் போனார் மோடி. அதிலிருந்து சில...
அமெரிக்க நாடாளுமன்றம் ஒற்றுமையுடன் செயல்படுவதாக என்னிடம் சொல்லப்பட்டது. அதை நான் பாராட்டுகிறேன். ஆனால் நீங்கள் தனியாக இல்லை. இதேபோன்ற ஒற்றுமையை நான் இந்திய நாடாளுமன்றத்திலும் தொடர்ந்து கண்டு வருகிறேன். குறிப்பாக எங்களது ராஜ்யசபாவில் என்று மோடி கூறியபோது எம்.பிக்களிடையே சிரிப்பலை எழுந்து அடங்கியது.
அமெரிக்காவைப் போலவே நமது மேல் சபையிலும் (ராஜ்யசபா) ஆளுங்கட்சிக்கு மெஜாரிட்டி கிடையாது. எதிர்க்கட்சிகள்தான் அங்கு ஆதிக்கம் செலுத்துகின்றன. அமெரிக்காவைப் போலவே இங்கும் எதிர்க்கட்சிகள் முக்கிய சட்ட மசோதாக்களை நிறைவேற்றுவதற்கும், சீர்திருத்தங்களைக் கொண்டு வருவதற்கும் பல்வேறு வகையில் இடையூறு செய்வதையே மோடி இப்படி மறைமுகமாகக் குறிப்பிட்டுப் பேசினார்.
மோடியின் பேச்சின்போது எட்டு முறை அமெரிக்க எம்.பிக்கள் எழுந்து நின்று கை தட்டிப் பாராட்டினர். அதேபோல கிட்டத்தட்ட 60க்கும் மேற்பட்ட முறை அவர்கள் கைதட்டி மோடி பேச்சை ரசித்தனர்.
Click it and Unblock the Notifications
Sign in with Google