சிக்கலில் சீனா.. “ஆமா பொருளாதார நெருக்கடி இருக்கு..” ஜி ஜின்பிங் ஒப்புதல்! மீண்டு வர தீவிர முயற்சி

பெய்ஜிங்: உலகின் மிகப்பெரிய பொருளாதாரம் கொண்ட சீனா, கடந்த ஆண்டில் தொடர் சரிவுகளை சந்தித்து வந்திருக்கிறது. இந்நிலையில் புத்தாண்டு உரையாற்றிய அந்நாட்டின் அதிபர் ஜி ஜின்பிங், இந்த பொருளாதார சிக்கலை ஒப்புக்கொண்டுள்ளார். மேலும் அதிலிருந்து நாடு விரைவில் மீட்கப்படும் என்றும் நம்பிக்கை தெரிவித்திருக்கிறார்.

சர்வதேச அளவில் அமெரிக்காவுக்கு சவால் விடும் வகையில் சீனா பெரிய அளவில் வளர்ந்து வருகிறது. ஒட்டுமொத்த ஆசிய கண்டத்தில் சீன தயாரிப்பு பொருட்கள்தான் அதிக அளவில் பரவி கிடக்கின்றன. இந்த அளவுக்கு பலமிக்க பொருளாதாரம், கொரோனா தொற்றுக்கு பின்னர் மெல்ல சரிவை கண்டிருக்கிறது. இந்த சரிவு தற்காலிகமானதுதான் என்றும், விரைவில் நாடு இதிலிருந்து மீண்டுவிடும் எனவும் அந்நாட்டு அரசு நம்பிக்கை தெரிவித்திருந்தது.

ஆனால் 2023ம் ஆண்டில் இந்த மீட்சி ஏற்படவில்லை. இந்நிலையில், புத்தாண்டு உரையில் அந்நாட்டு அதிபர் ஜி ஜின்பிங், இந்த பொருளாதார சிக்கலை ஒப்புக்கொண்டுள்ளார். மேலும் அதிலிருந்து நாடு விரைவில் மீட்கப்படும் என்றும் நம்பிக்கை தெரிவித்திருக்கிறார். ஜி ஜின்பிங் பேசியதாவது, "கடந்த ஆண்டு மிகவும் சிரமமாக இருந்திருக்கிறது. மக்கள் வேலை தேடுவதிலும், அடிப்படை தேவைகளை பூர்த்தி செய்வதிலும் நெருக்கடிகளை எதிர்கொண்டனர்.

இதற்கு எதிராக நாங்கள் நாட்டின் நிலையான மற்றும் நீடித்த வளர்ச்சிக்காக உழைத்து வருகிறோம். பொருளாதார மீட்சியின் வேகத்தை ஒருங்கிணைந்து செயல்படுத்துவோம். இந்த அரசின் குறிக்கோள், மக்களுக்கு சிறந்த வாழ்க்கையை வழங்குவதுதான். நாடு முழுவதும் உள்ள இளைஞர்களுக்கு சிறந்த கல்வி மற்றும் தொழில் வாய்ப்புகளையும், முதியோர்களுக்கு சுகாதாரத்தையும் நாங்கள் உறுதியளிக்கிறோம்" என்று கூறியுள்ளார்.

சீனா உலகின் பல நாடுகளை காட்டிலும் வித்தியாசமான பொருளாதார முறையை பின்பற்றி வருகிறது. கல்வி, மருத்துவம் என்பது அந்நாட்டின் அடிப்படை வசதிகளில் ஒன்று என்பதால் இதற்காக நிறையை மெனக்கெடுகிறது. அதேநேரம் எந்த மாதிரியான கொள்கைகளை சீனா பின்பற்றி வருகிறது என்பதை வரையறுப்பது கடினமாக இருக்கிறது. அல்லது கொள்கை குறித்த வெளிப்படைத்தன்மையை சீன அரசு விரும்பவில்லை.

இது முதலீட்டாளர்கள் மத்தியில் பெரும் அதிருப்தியை ஏற்படுத்தியுள்ளது. எனவே சீனாவிலிருந்து முதலீடுகள் இந்தியா உள்ளிட்ட நாடுகளை நோக்கி திரும்பி இருக்கின்றன. மட்டுமல்லாது வீடியோ கேம் குறித்த அந்நாட்டு அரசின் சமீபத்திய அறிவிப்பு, வீடியோ கேம் நிறுவனங்களிடையே பெரும் நஷ்டத்தை ஏற்படுத்தியது. இவையெல்லாம் சேர்ந்து சீனாவின் பொருளாதாரத்தில் தாக்கத்தை ஏற்படுத்தியுள்ளன. இதற்கிடையில் தைவான் விவகாரத்தில் சீனா காட்டி வரும் கறார் தன்மையும், சர்வதேச அளவில் அதிருப்தியை ஏற்படுத்தியுள்ளது.

இத்தனை சிக்கல்களுக்கு மத்தியில்தான் சீனா போராடிக்கொண்டிருக்கிறது. இந்த ஆண்டின் முதல் காலாண்டில் நாட்டின் பொருளாதாரத்தை 5%க்கு உயர்த்துவதே சீனாவின் தற்போதைய நோக்கம். இந்த சவால்களில் சீனா வெல்கிறதா? என்பது ஏப்ரல் மாதத்தில் தெரிந்துவிடும்.

English summary

China, the world's largest economy, has experienced a series of declines in the past year. In this case, the president of the country, Xi Jinping, who addressed the New Year, has acknowledged this economic problem. He also expressed hope that the country will recover from it soon.