புடினை விமர்சித்த தலைவர்.. டீ சாப்பிட்டார்.. கோமாவில் விழுந்தார்.. ரஷ்யாவில் அதிர்ச்சி

மாஸ்கோ: ரஷ்யாவின் எதிர்க்கட்சித் தலைவரும் அதிபர் விளாடிமிர் புடினை விமர்சித்து வந்தவருமான அலெக்ஸி நாவல்னி நச்சு விஷம் காரணமாக திடீரென கோமாவுக்கு சென்றதாகவும் தற்போது மருத்துவமனையில் சிகிச்சைக்காக சேர்க்கப்பட்டு இருப்பதாகவும் தகவல் வெளியாகியுள்ளது.

ரஷ்யாவின் எதிர்க்கட்சித் தலைவராக இருப்பவர் 44 வயது அலெக்ஸி நாவல்னி. இவருக்கு நச்சு விஷம் ஏற்பட்டதால், திடீரென கோமா நிலைக்கு சென்றதாகவும், தற்போது ஓம்ஸ்க் மருத்துவமனையில் சேர்க்கப்பட்டு சிகிச்சை அளிக்கப்பட்டு வருவதாகவும் அவரது செய்தி தொடர்பாளர் கிரா யார்மிஷ் தெரிவித்துள்ளார்.

இதுகுறித்து மேலும் அவர் தெரிவித்து இருக்கும் செய்தியில், '' அலெக்ஸி நாவல்னி கோமா நிலையில் இருக்கிறார்'' என்று தெரிவித்துள்ளார். அவரது நிலை மிகவும் மோசமான நிலையில் இருப்பதாக அந்த நாட்டின் சுகாதாரத்துறை அமைச்சர் தெரிவித்துள்ளார்.

இன்று காலை அவர் டீ மட்டும் குடித்தார். அதில் இருந்து அவருக்கு ஏதாவது விஷம் ஏற்பட்டு இருக்கலாம் என்று சந்தேகிக்கிறோம். விஷம் கலந்த உணவு சூடாக இருக்கும்போது சாப்பிட்டால், உடனடியாக விஷம் உடலில் ஏறிவிடும் என்று மருத்துவர்கள் கருத்துத் தெரிவித்துள்ளனர். தற்போது வென்டிலேட்டரில் அவருக்கு சிகிச்சை அளிக்கப்பட்டு வருகிறது.

டோம்ஸ்க் நகரில் இருந்து மாஸ்கோவுக்கு விமானத்தில் செல்லும்போது, அலெக்ஸிக்கு இந்த நச்சு விஷம் ஏற்பட்டுள்ளது. உடனடியாக விமானத்தை ஓம்ஸ்க் நகரில் இறக்கி, மருத்துவமனைக்கு ஆம்புலன்சில் எடுத்து செல்லப்பட்டார். ஸ்டெச்சரில் எடுத்து செல்வதற்கு முன்பு பயங்கரமான வலி இருந்ததாக அலெக்ஸி தெரிவித்துள்ளார். இது அந்த நாட்டில் பரபரப்பை ஏற்படுத்தியுள்ளது.

English summary

Russian opposition politician Alexei Navalny is in a coma