ஒன்றல்ல, 2 கின்னஸ் சாதனை படைத்துள்ள சூப்பர் நாய் ஸ்வீட் பீ
வாஷிங்டன்: அமெரிக்காவில் உள்ள நாய் ஒன்று 2 கின்னஸ் சாதனைகள் படைத்துள்ளது.
அமெரிக்காவைச் சேர்ந்த அலெக்ஸ் ரோதகர் என்பவரின் செல்ல நாய் ஸ்வீட் பீ. ஆஸ்திரேலிய ஷெபர்ட் மற்றும் பார்டர் கோலி கலப்பினத்தைச் சேர்ந்தது. ஸ்வீட் பீ தலையில் ஒரு கேனை வைத்துக் கொண்டு அது கீழே விழாமல் 100 மீட்டர் தூரம் ஓடியுள்ளது. 100 மீட்டர் தூரத்தை 2 நிமிடங்கள் 55 நொடிகளில் கடந்துள்ளது.
தலையில் கேனை வைத்து 100 மீட்டர் தூரத்தை வேகமாக கடந்த நாய் என்று ஸ்வீட் பீ கின்னஸ் சாதனை புத்தகத்தில் இடம்பிடித்துள்ளது. கடந்த 2008ம் ஆண்டு இலினாய்ஸ் மாநிலம் கிரேஸ்லேக்கில் உள்ள லேக் கவுன்ட்டி கல்லூரியில் நடந்த போட்டியில் தான் ஸ்வீட் பீ சாதனை படைத்ததாக கின்னஸ் சாதனை அலுவலகம் தெரிவித்துள்ளது.
ஸ்வீட் பீ மேலும் ஒரு கின்னஸ் சாதனையும் படைத்துள்ளது. அதாவது தலையில் ஒரு கிளாஸ் தண்ணீரை வைத்துக் கொண்டு அது கீழே விழாமல் 10 அடி எடுத்து வைத்துள்ளது ஸ்வீட் பீ.
ஒரு நாய் தலையில் ஒரு கிளாஸ் தண்ணீருடன் அதிக தூரம் நடந்துள்ளது என்ற கின்னஸ் சாதனையை படைத்துள்ளது அது.