ஐ.நா. பாதுகாப்பு கவுன்சிலில் ஜனநாயக நாடுகள் இடம்பெற வேண்டும்... ஜி-4 மாநாட்டில் மோடி வலியுறுத்தல்

Published: Saturday, September 26, 2015, 22:10 [IST]

Subscribe to Oneindia Tamil

நியூயார்க் : ஐ.நா. பாதுகாப்பு கவுன்சிலில் மிகப்பெரிய ஜனநாயக நாடுகள் இடம்பெற வேண்டும் என்று ஜி-4 மாநாட்டில் பிரதமர் மோடி வலியுறுத்தியுள்ளார்.

ஐ.நா. பாதுகாப்பு கவுன்சிலை குறிப்பிட்ட கால வரையறைக்குள் விரிவுப்படுத்த வேண்டும் எனவும் ஜி-4 மாநாடு வலியுறுத்தியுள்ளது.

நியூயார்க்கில் இன்று (சனிக்கிழமை) மாலை நடைபெற்ற இக்கூட்டத்தில் இந்திய பிரதமர் மோடி, பிரேசில் அதிபர் தில்மா ரூசெப், ஜப்பான் பிரதமர் ஷின்ஷோ அபே, ஜெர்மனி பிரதமர் ஏஞ்சலினா மார்க்கெல் ஆகியோர் கலந்து கொண்டனர்.

இதில், ஐ.நா.பாதுகாப்பு அவையில் நிரந்தர உறுப்பினராக மேற்கொள்ள வேண்டிய அணுமுறைகள் குறித்து ஆலோசிக்கப்பட்டது. இக்கூட்டத்தில் பேசிய பிரதமர் மோடி, உலகின் மிகப்பெரிய ஜனநாயக நாடான இந்தியா உள்ளிட்ட அமைதிக்கு பாடுபடும் ஜனநாயக நாடுகள் ஐ.நா. பாதுகாப்பு கவுன்சிலில் இடம்பெற வேண்டும் என்றும், அதற்கான முயற்சியின் தொடக்கமாக இக்கூட்டம் நடைபெறுவதாகவும் தெரிவித்தார். இதில் உறுதியான தீர்வு கிடைக்க வேண்டும் என்றும் மோடி வலியுறுத்தினார்.

மாநாட்டின் இறுதியில் வெளியிடப்பட்ட கூட்டறிக்கையில், ஐ.நா. பாதுகாப்பு கவுன்சிலில் உறுப்பினர்களின் எண்ணிக்கையை அதிகரித்து சட்டப்பூர்வமான மற்றும் ஆக்கப்பூர்வமான அமைப்பாக செயல்படுத்துவது அவசியம் என தெரிவிக்கப்பட்டுள்ளது.

பாதுகாப்பு கவுன்சிலில் நிரந்தர இடம் பெறும் விவகாரத்தில் மிக அழுத்தமாக தங்கள் கோரிக்கையை வலியுறுத்துவதாகவும் ஜி 4 நாடுகள் கூட்டறிக்கையில் குறிப்பிடப்பட்டுள்ளது.

ஐ.நா.பாதுகாப்பு அவையில் தற்போது அமெரிக்கா, ரஷ்யா, பிரிட்டன், பிரான்ஸ், சீனா ஆகிய 5 நாடுகள் நிரந்தர உறுப்பினர்களாக உள்ளன. இந்த அமைப்பை விரிவுப்படுத்தி, நிரந்தர உறுப்பினராக ஆவதற்கு இந்தியா, பிரேசில், ஜப்பான், ஜெர்மனி ஆகிய 4 நாடுகள் முயற்சித்து வருகின்றன.

Published On September 26, 2015