பின்வாங்கிய அமெரிக்கா.. சீனாவின் வழிக்கு வந்த டிரம்ப்! கப்பல் வணிகத்தில் புதிய திருப்பம்

வாஷிங்டன்: சீன தயாரிப்பு கப்பல்களுக்கு அமெரிக்கா அதிக கட்டணத்தை விதித்திருந்தது. இந்த கட்டணம் காரணமாக கப்பல் போக்குவரத்து சர்வதேச அளவில் பாதிக்கப்பட்டிருந்தது. இந்நிலையில், சீன கப்பலுக்கான கட்டணத்தை அமெரிக்கா எளிமைப்படுத்தி இருக்கிறது.

இந்த கட்டண திருத்தம், சீனாவுக்கு சாதகமாக மாறியிருக்கிறது. கடல்சார் வணிகத்தில் இன்றும் சீனாதான் டாப்பில் இருக்கிறது. எனவே அதை பகைத்துக்கொள்ள கூடாது என்பதற்காக டிரம்ப் தனது கட்டணங்களை குறைத்திருக்கிறார் என்று பொருளாதார நிபுணர்கள் கூறுகின்றனர்.

சீனாவின் கப்பல்கள் ஒவ்வொன்றும் அமெரிக்க துறைமுகத்தில் நுழையும்போது சுமார் 1.5 மில்லியன் அமெரிக்க டாலர் வரை கட்டணம் செலுத்த வேண்டும் என்று டிரம்ப் உத்தரவிட்டிருந்தார். சீன கப்பல் கட்டுமான துறைக்கு மாற்றாக அமெரிக்க கப்பல் கட்டுமான துறையை வளர்த்தெடுக்க வேண்டும் என்பதே இதன் நோக்கம். ஆனால் உண்மையில் சீனாவை பழிதீர்க்க வேண்டும் என்பதால்தான் இப்படியான கட்டணங்கள் விதிக்கப்பட்டிருந்தது என்பது உலகம் அறிந்த விஷயம்.

தற்போது வரி பிரச்சனையோடு சேர்த்து, கட்டண உயர்வும் அமெரிக்காவுக்கு எதிராக திரும்பியது. காரணம், உலக வர்த்தகத்தில் 80% கடல் வழியாகத்தான் நடைபெறுகிறது. கடல் வணிகத்திற்கு கப்பல்கள் தேவை. உலக அளவில் அதிக அளவில் கப்பல்களை கட்டுவது சீனாதான். அமெரிக்கா மற்றும் ஐரோப்பிய நாடுகளை காட்டிலும் சீனா அதிக எண்ணிக்கையில் கப்பல்களை உருவாக்குகிறது. இந்த கப்பல்கள் தரமானதாகவும், விலையும் ஓரளவு நியாயமானதாகவும் இருப்பதால் சீன கப்பல்களுக்கு மவுசு அதிகம்.

கப்பல்கள் மட்டுமல்ல, கப்பல்களிலிருந்து பொருட்களை இறக்க பயன்படும் கிரேன்கள், பொருட்களை கொண்டு செல்ல பயன்படும் கன்டெய்னர்கள், அதன் சேஸ் பார்ட்கள் என அனைத்தும் சீனாவில்தான் உற்பத்தி செய்யப்படுகிறது. துறைமுக கிரேன்களில் 100 சதவிகிதம் சீனாவின் ஆதிக்கம் இருக்கிறது.

யோசித்து பாருங்கள் ஆண்டுக்கு 1700 கப்பல்களுக்கும் அதிகமாக உற்பத்தி செய்யும் சீனாவை பகைத்துக்கொள்வது முட்டாள்தனமாகத்தான் தோன்றும். ஏனெனில், இன்றுவரை கடல் போக்குவரத்தில் ஏற்றுமதிக்கு என அமெரிக்க கப்பல்கள் 1 சதவிகிதம் கூட பயன்படுத்தப்படுவதில்லை. அடுத்த 4 ஆண்டுகளில் கடல் போக்குவரத்தில் ஏற்றுமதிக்கு அமெரிக்க கப்பல்களை 1 சதவிகிதம் அளவுக்கு உயர்த்த டிரம்ப் முடிவெடுத்துள்ளார். இது 2035க்குள் 4%, 2047க்குள் 15% ஆக அதிகரிக்க வேண்டும் என்றும் உத்தரவிட்டிருக்கிறார்.

எல்லாம் ஓகேதான் ஆனால் அதுவரை ஏற்றுமதிக்கு என்ன செய்வது? எனவேதான் சீன கப்பல்களுக்கு விதிக்கப்பட்ட கட்டணங்கள் குறைக்கப்பட்டிருக்கின்றன.

English summary

The United States had imposed high fees on China-manufactured ships. Due to this fee, international maritime shipping was affected. In this situation, the U.S. has now simplified the fee structure for Chinese ships.