யு.எஸ்.: இளம்பெண்ணை திட்டி அழவைத்து விமானத்தில் இருந்து இறக்கிவிட்ட சிப்பந்தி

அரிசோனா: அமெரிக்காவில் விமானத்தில் அழுத 27 வயது பெண்ணை விமான சிப்பந்தி ஒருவர் கீழே இறக்கிவிட்ட சம்பவம் பிற பயணிகளை அதிருப்தி அடையச் செய்துள்ளது.

அமெரிக்காவின் ஆரிகன் மாநிலத்தில் உள்ள போர்ட்லேண்டைச் சேர்ந்தவர் டியானா ஃபோ(27). அவர் அரிசோனா மாநிலத்தில் உள்ள டக்சனுக்கு விடுமுறையை கழிக்கச் சென்றார். விடுமுறையை கழித்த பிறகு அவர் போர்ட்லேண்ட் திரும்ப பீனிக்ஸில் அமெரிக்கன் ஏர்லைன்ஸ் விமானம் 408ல் ஏறினார்.

விமானத்தில் ஏறிய அவர் தனது இருக்கையில் அமர வரிசையில் நின்றபோது சக பயணி ஒருவருடன் பேசியுள்ளார். இதை பார்த்த ஆண் விமான சிப்பந்தி அவரை திட்டியுள்ளார். மூன்று முறை கூறிவிட்டேன் பேசாமல் ஒழுங்காக அங்கேயே நில்லுங்கள் என்று அவர் டியானாவை மிரட்டியுள்ளார்.

அதன் பிறகு போங்கள் உங்கள் இருக்கையில் அமர்ந்து கொள்ளுங்கள் என்று கூறியுள்ளார். இதனால் மனமுடைந்த டியானா தனது இருக்கையில் அமர்ந்ததும் அழத் துவங்கிவிட்டார். இந்நிலையில் அந்த சிப்பந்தி திரும்ப வந்து உங்கள் பைகள் எங்கே உங்களை விமானத்தை விட்டு கீழே இறக்கிவிடுகிறோம் என்று கூறி அவரின் உடைமைகளை எடுத்தார்.

டியானா வேறு வழியில்லாமல் அழுது கொண்டே விமானத்தை விட்டு கீழே இறங்கினார். இதை பார்த்த பிற பயணிகள் அதிருப்தியில் பூ பூ என்று கூறினர். இந்த சம்பவத்தை டியானாவுக்கு பின் இருக்கையில் அமர்ந்திருந்த ஒருவர் தனது செல்போனில் வீடியோ எடுத்து இணையதளத்தில் வெளியிட்டுள்ளார்.

English summary

A 27-year old woman was thrown off from American airlines flight 408 for weeping after a flight attendant scolded her.