"வெல்கம் டூ ஜக்கிஸ்தான்"... இந்த நாட்டுக்கு இவர்தான் ராசா, இவரே மந்திரி, இவரே குடிமகனும்!

Updated: Monday, November 2, 2015, 17:28 [IST]

Subscribe to Oneindia Tamil

நியூயார்க்: அமெரிக்காவைச் சேர்ந்த ஜக் லேன்ட்ஸ்பெர்க் ரொம்ப வித்தியாசமான நபராக இருக்கிறார். இவர் தான் வசித்து வரும் நான்கு ஏக்கர் நிலப்பகுதியை தனி நாடாக அறிவித்து அத்தனை பேரையும் அரள வைத்துள்ளார்.

நியூயார்க் அருகே இந்த குட்டி "நாடு" உள்ளது. இது சட்ட ரீதியாக எந்த அங்கீகாரத்தையும் பெறவில்லை என்றாலும் கூட, தான் ஒரு நாட்டுக்கு அதிபதி என்ற பெருமையை தானே பரப்பியபடி அசத்தி வருகிறார் ஜக்.

இவர் ஒரு கலைஞர் ஆவார். நியூயார்க் அருகே 4 ஏக்கர் நிலத்தை வாங்கிப் போட்ட அவர் அதற்கு ஜக்கிஸ்தான் என்று பெயர் வைத்து அதை தனி நாடாக பாவித்து செயல்பட்டு வருகிறார்.

ஜக்கிஸ்தான் குடியரசு

இந்த நாட்டுக்கு ரிபப்ளிக் ஆப் ஜக்கிஸ்தான் என்று இவர் பெயர் வைத்துள்ளார். இந்த நாட்டுக்குத் தனியாக கொடியும் உண்டு. அதாவது சிவப்பு, மஞ்சள் நிறத்தில இக்கொடி உள்ளது. பாஸ்போர்ட் கூட உண்டு. உள்ளே வருவர் பாஸ்போர்ட்டைக் காட்டி விட்டுத்தான் நுவைய முடியுமாம். 40 டாலர் கொடுத்து பாஸ்போர்ட் பெறலாமாம்.

பார்டர் வேற

இந்த நாட்டுக்கு எல்லைப் பாதுகாப்புப் படை வேறு உள்ளது. அதாவது ரோபோட்டுகளைப் பாதுகாப்புப் பணியில் ஈடுபடுத்தியுள்ளார் ஜக். எல்லைக் கோடும் போடப்பட்டுள்ளது.

இருக்கு ஆனா இல்லை!

இந்த நாட்டுக்கென்று ஒரு தத்துவத்தையும் உருவாக்கியுள்ளார். "Something from nothing" என்பதுதான் அந்த நாட்டின் மோட்டோ ஆகும்.

மக்கள்தான் இல்லை பாஸ்

இந்த நாட்டில் பாஸ்போர்ட், எல்லைப் பாதுகாப்பு எல்லாம் இருந்தாலும் கூட மக்கள்தான் கிடையாது. ஜக் மட்டும்தான் இந்த நாட்டில் இருக்கிறார். அரசும் கிடையாது. பொருளாதாரமும் கிடையாது. தன்னை தானே அதிபராக அறிவித்துள்ளார் ஜக்.

பேப்பர் நாடு

இதுகுறித்து 30 வயதாகும் ஜக் கூறுகையில் இது பேப்பர் அளவில் உள்ள நாடுதான். கற்பனையான நாடுதான். சட்டப்பூர்வமானதும் கிடையாது. ஆனாலும் இப்படி ஒரு நாடு இருப்பதே எனக்குப் பெருமைதான். படிப்படியாக இது இறையாண்மை கொண்ட நாடாக மாறினால் சந்தோஷம்தான்.