ஸ்டன்ட் மாஸ்டர் கனல் கண்ணன் பெரியார் சிலையை எப்போது உடைக்கணும் தெரியுமா?.. திமுக அமைச்சர்

கன்னியாகுமரி: ஸ்டன்ட் மாஸ்டர் கனல் கண்ணன் பெரியார் சிலையை கனவில்தான் உடைக்க வேண்டும் என அமைச்சர் மனோ தங்கராஜ் தெரிவித்துள்ளார்.

இது குறித்து அமைச்சர் மனோ தங்கராஜ் தமிழ் தொலைகாட்சிக்கு அளித்த பேட்டியில் கூறுகையில் நடிகர் ரஜினிகாந்த் எல்லாருடனும் நல்ல நட்பில் இருப்பவர். அவர் மீது மதிப்பும் மரியாதையும் உண்டு.

அவர் ஆளுநரை சந்தித்த விவகாரத்தில் மாறுபட்ட கருத்து இருப்பதாக எதுவும் தெரியவில்லை. தான் திரையுலகில் இருக்கிறேன். அரசியலுக்கு வரவில்லை என்று கூறிவிட்டார்.

ஆளுநர் சந்திப்பு

அவருடைய சந்திப்பை எல்லாம் அரசியல் ஆதாயம் இருப்பது போல் காட்டுவது ரொம்ப தப்பு. ஆளுநரை பார்ப்பது அவர்களுடைய சார்பு அரசியல் என பார்த்தால் ஆளுநர் கட்சி அரசியலை நடத்த அந்த மாளிகையை பயன்படுத்துகிறாரா என்ற கேள்வி வரும். இது சரியில்லை. ஆளுநர் என்பவர் அரசாங்கத்திற்கு துணையாக இருக்க வேண்டியவர்.

ரஜினிகாந்த் சந்திப்பு

எனவே ஆளுநரை ரஜினிகாந்த் சந்திப்பதை எல்லாம் சாதாரண நிகழ்வாகவே நான் பார்க்கிறேன். ஆளுநர் மாளிகையில் அரசியல் பேசியதாக அரசியலை சாராத ஒருவர் சொல்வதற்கு நான் கருத்து சொல்ல முடியாது. ஆளுநர் அவரது மாளிகையில் யாரை வேண்டுமானாலும் சந்திக்கலாம். ஆனால் ஆளுநர் என்பவர் அரசியல் இயக்கம் போல் இயங்குவது என்பது எல்லாம் நம் நாட்டில் ஏற்றுக் கொள்ள முடியாது.

ஜனநாயக ரீதியில்

ஏனென்றால் ஜனநாயக ரீதியில் தேர்வு செய்யப்பட்ட அரசு தமிழகத்தில் இருக்கிறது. இந்த தமிழக அரசுக்கு எதிராக போட்டி அரசியலை கொண்டு வருவது என்பது எந்த காலத்திலும் பொய்த்து போக கூடிய ஒன்றாகும். பல்வேறு காலகட்டங்களில் பல்வேறு ஆளுநர்கள் பல தவறுகளை செய்ய முற்பட்டுள்ளார்கள். அது தமிழகத்தை பொருத்தமட்டில் அது எந்த காலத்திலும் எடுபட்டது இல்லை.

கனல் கண்ணன்

கனல் கண்ணன் கனவில்தான் பெரியார் சிலையை உடைக்க வேண்டும் என அமைச்சர் மனோ தங்கராஜ் தெரிவித்துள்ளார். சென்னை மதுரவாயலில் நடந்த கூட்டத்தில் பேசிய கனல்கண்ணன் , கடவுளே இல்லை என்று சொன்ன பெரியாரின் சிலை ஸ்ரீரங்கம் கோயில் வாசலில் எதற்காக வைக்கப்பட்டுள்ளது ? அதை அகற்ற வேண்டும் என கூறி கடந்த 4 நாட்களுக்கு முன்னர் பரபரப்பை கிளப்பினார். ரஜினிகாந்த்- ஆளுநருடனான சந்திப்பின்போது அரசியல் பேசியது குறித்து மார்க்சிஸ்ட் கம்யூனிஸ்ட் கட்சி உள்ளிட்டவை கண்டனம் தெரிவித்துள்ளது குறிப்பிடத்தக்கது. இந்த விவகாரத்தில் திமுக எதிர் கருத்தை கூறாமல் இருக்கிறது.

English summary

Minister Mano Thangaraj says that Kanal Kannan can break the Periyar Statue in his dream.