கிளம்பு கிளம்பு அந்துபோச்சு! ஒரு புடி மண்ண அள்ள முடியாது! செந்தில்பாலாஜி ஆதரவாளர் சர்ச்சை போஸ்டர்!

கரூர்: கரூரில் வருமான வரித்துறை அதிகாரிகளுக்கு எதிராக அமைச்சர் செந்தில்பாலாஜியின் ஆதரவாளர் ஒருவர் ஒட்டியுள்ள போஸ்டர் பெரும் சர்ச்சையை ஏற்படுத்தியிருக்கிறது.

கிளம்பு கிளம்பு அந்து போச்சு என்றும் இது காலா கில்லா எனவும் வாசகம் அச்சிடப்பட்டுள்ள போஸ்டரில் இங்க இருந்து ஒரு புடி மண்ண கூட எடுத்துகிட்டு போக முடியாது என வருமான வரித்துறையினரை மிரட்டும் வகையில் இந்த போஸ்டர் ஒட்டப்பட்டுள்ளது.

காலா திரைப்படத்தில் வரும் ரஜினிகாந்த் கெட்டப்பில் அமைச்சர் செந்தில்பாலாஜி அமர்ந்திருப்பது போன்றும் அவருக்கு அருகே புலி ஒன்று உருமிக் கொண்டு நிற்பதை போன்றும் போஸ்டர் டிசைன் செய்யப்பட்டுள்ளது.

கரூரில் கடந்த 2 நாட்களாக நடைபெற்றும் வரும் காட்சிகளை பார்த்தால் சினிமா காட்சிகளை மிஞ்சும் அளவுக்கு பல ட்விஸ்ட்கள் இருக்கின்றன. ரகசிய காப்பு உறுதிமொழி ஏற்று அமைச்சராக உள்ள ஒருவரை இது போல் சித்தரித்ததோடு மட்டுமல்லாமல் வருமான வரித்துறையினரை மிரட்டும் வகையில் ஒட்டப்பட்டுள்ள போஸ்டர் செந்தில்பாலாஜிக்கு தான் நெருக்கடி ஏற்படுத்தும் எனத் தெரிவிக்கப்படுகிறது.

கரூர் திருமாநிலையூரை சேர்ந்த செல்வேந்திரன் என்பவர் பெயரில் இந்த போஸ்டர்கள் ஒட்டப்பட்டுள்ளன. ஏற்கனவே வருமான வரித்துறையினரை அமைச்சர் செந்தில்பாலாஜியின் தம்பி அசோக் ஆதரவாளர்கள் தாக்கிய விவகாரம் பூதாகரமாகி டெல்லி வரை எதிரொலித்துள்ளது.

இந்நிலையில் இது போன்ற போஸ்டர்கள் வருமான வரித்துறை உயர் அதிகாரிகளை மேலும் கோபப்படுத்தும் என்பதில் சந்தேகமே வேண்டாம். ஆர்வக்கோளாறில் ஆதரவாளர்கள் செய்யும் காரியங்களால் அமைச்சர் செந்தில்பாலாஜிக்கும் அவரது தம்பி அசோக்கிற்கும் தான் பின்னாட்களில் பெரும் தலைவலியாக அமையும்.

நாடாளுமன்ற புதிய கட்டிட திறப்பு விழா முடிந்ததும் டெல்லியிலிருந்து வருமான வரித்துறை உயர் அதிகாரிகள் சிலர் தமிழகம் வரவுள்ளதாகவும் செந்தில்பாலாஜி தொடர்புடைய இடங்களில் நடத்தப்பட்ட ரெய்டின் பிடியை மேலும் இறுக்கவுள்ளதாகவும் தெரிவிக்கப்படுகிறது.

English summary

A poster by a supporter of Minister Senthil Balaji against income tax officials in Karur has created a huge controversy.