சட்டசபை தேர்தல் காங். தோல்விக்கு காரணம் 'சனாதன தர்ம' பேச்சுதானா? நடந்தது என்ன? உதயநிதி விளக்கம்!

கரூர்: சனாதன தர்ம ஒழிப்பு பேச்சை 'இனப் படுகொலை' என திரித்து பிரதமர் மோடி மற்றும் பாஜகவினர் வடமாநிலங்களில் தேர்தல் பிரசாரம் செய்ததாக தமிழ்நாடு அமைச்சர் உதயநிதி ஸ்டாலின் சாடியுள்ளார்.

சத்தீஸ்கர், ராஜஸ்தான், மத்திய பிரதேச சட்டசபை தேர்தலில் காங்கிரஸ் கட்சி பெரும் தோல்வியைத் தழுவியது. ராஜஸ்தான், சத்தீஸ்கரில் காங்கிரஸிடம் இருந்து ஆட்சியை பாஜக கைப்பற்றியது.

வட இந்திய மாநிலங்களில் காங்கிரஸ் மிகப் பெரும் தோல்வியைத் தழுவியதற்கு தமிழ்நாடு அமைச்சர் உதயநிதி ஸ்டாலின், சனாதன தர்மத்தை ஒழிப்போம் என ஒருநாள் பேசியதுதான் காரணம் என காங்கிரஸ் மற்றும் பாஜகவினர் நேற்று முதலே விமர்சித்து வருகின்றனர். இந்த நிலையில் கரூரில் நடைபெற்ற திமுக கூட்டத்தில் உதயநிதி ஸ்டாலின் நேற்று பேசியதாவது: சனாதன தர்மம் என்பது டெங்கு, மலேரியா, கொரோனாவை உருவாக்கும் கொசுக்கள், வைரஸ் போன்றது. அதை ஒழிக்க வேண்டும் என பேசியிருந்தேன். ஆனால் பிரதமர் மோடி மற்றும் பாஜகவினர், சனாதன தர்மத்தை பின்பற்றுவர்களை இனப்படுகொலை செய்ய வேண்டும் என பேசியதாக திரித்து தேர்தல் பிரசாரம் செய்தனர்.

சில சாமியார்கள் என் தலைக்கு ரூ5 கோடி முதல் ரூ10 கோடி வரை விலை வைத்தனர். இப்போது இந்த வழக்கு நீதிமன்றத்தில் இருக்கிறது. நான் நீதிமன்றத்தை நம்புகிறேன். சனாதன தர்மம் ஒழிப்பு பேச்சுக்காக என்னை மன்னிப்பு கேட்க சொன்னார்கள். ஆனால் இந்த பேச்சுக்காக மன்னிப்பு கேட்க முடியாது. நான் முதல்வர் ஸ்டாலின் மகன்; கருணாநிதியின் பேரன். என்னுடைய தத்துவத்தை, கொள்கையைத்தான் பேசினேன். அதற்கெல்லாம் மன்னிப்பு கேட்க முடியாது என கூறிவிட்டேன் என்றார்.

கடந்த செப்டம்பர் மாதம் சென்னையில் நடைபெற்ற கருத்தரங்கில் உதயநிதி ஸ்டாலின், சனாதன தர்மத்தை ஒழிக்க வேண்டும் என பேசினார். ஆனால் பாஜகவின் ஐடி விங் தலைவர் அமித் மாள்வியா, சனாதன தர்மத்தை பின்பற்றுவோரை இனப்படுகொலை செய்ய வேண்டும் என உதயநிதி ஸ்டாலின் பேசினார். யூதர்களை ஹிட்லர் இனப்படுகொலை செய்தது போல உதயநிதி பேசிவிட்டார் என பொய்யான தகவலை சமூக வலைதளங்களில் பதிவிட்டார். இதனையே பிரதமர் மோடி உள்ளிட்டோரும் தீவிரமாக பிரசார ஆயுதமாக கையில் எடுத்தனர். வட இந்திய மாநில காங்கிரஸ் தலைவர்களான கமல்நாத் உள்ளிட்டோரும் உதயநிதி பேச்சுக்கு அதிருப்தி தெரிவித்திருந்தது குறிப்பிடத்தக்கது.

English summary

Tamil Nadu Minister Udhayanidhi Stalin has slammed BJP for twisted his speech against Sanatana Dharma.