சிஷ்யனை வீழ்த்த குருவை களமிறக்கும் எடப்பாடி? கரூர் நாடாளுமன்றத் தொகுதி அதிமுக வேட்பாளர் யார்?
கரூர்: கரூர் நாடாளுமன்றத் தொகுதியில் திமுகவே நேரடியாக பேட்டியிட்டாலும் சரி அல்லது காங்கிரஸ் மீண்டும் களமிறங்கினாலும் சரி இரண்டில் ஒன்று பார்த்துவிடுவது என்ற முடிவோடு இருக்கிறார் அதிமுக பொதுச்செயலாளர் எடப்பாடி பழனிசாமி.
செந்தில்பாலாஜியின் சொந்த மாவட்டம் கரூர் என்பதால் அங்கு திமுக கூட்டணியை வீழ்த்தும் வகையில் இப்போதே வலிமையான வேட்பாளரை அடையாளம் காண்பதில் கவனம் செலுத்தி வருகிறாராம் எடப்பாடி பழனிசாமி.
அந்த வகையில் கரூர் மக்களவைத் தொகுதியில் அதிமுக சார்பில் போட்டியிட முன்னாள் அமைச்சரான சின்னச்சாமி ஆர்வம் காட்டுவதாக தெரிவிக்கப்படுகிறது. சின்னச்சாமியை பொறுத்தவரை ஏற்கனவே கரூர் மக்களவைத் தொகுதி உறுப்பினராக இருந்திருக்கிறார். இதனால் தொகுதி முழுவதும் இவருக்கு அத்துப்படி. அதேபோல் அவர் சார்ந்த சமுதாய வாக்கு வங்கியையும் கணிசமாக கையில் வைத்துள்ளார்.
கரூர் நாடாளுமன்றத் தொகுதியில் திமுக கூட்டணி சார்பில் மீண்டும் ஜோதிமணி போட்டியிடுவார் எனத் தெரிகிறது. இதனால் தங்கள் வெற்றி எளிது என அதிமுகவினர் இப்போதே அதீத நம்பிக்கையுடன் வலம் வர ஆரம்பித்துள்ளனர். இதனிடையே தொகுதி முழுவதும் பழைய தொடர்புகளை புதுப்பிக்கும் பணிகளை சின்னச்சாமி தரப்பு முன்னெடுத்து வருகிறது. சின்னச்சாமியை பொறுத்தவரை செந்தில்பாலாஜி கொடுத்த குடைச்சலால் தான் அதிமுகவிலிருந்து திமுகவுக்கு சென்றார்.
பிறகு செந்தில்பாலாஜி திமுகவுக்கும் வந்து குடைச்சல் கொடுப்பார் என்பதை முன்பே அறியாத அவர், கடந்த சட்டமன்றத் தேர்தலுக்கு முன்பு எடப்பாடி பழனிசாமி தலைமையை ஏற்று மீண்டும் அதிமுகவில் சேர்ந்துவிட்டார். இப்போது அவருக்கு உரிய அங்கீகாரத்தை எடப்பாடி பழனிசாமி கொடுத்து வருகிறார்.
செந்தில்பாலாஜி தரப்பு தேர்தலின் போது என்னென்ன வியூகங்களை வகுக்கும், வெற்றிக்காக எப்படியெல்லாம் காய் நகர்த்தும் என்பதை கரூர் சின்னச்சாமி அறியாதவர் அல்ல. இதனால் நீயா? நானா? என பார்த்துவிடுவோம் என்ற சவாலுடன் கரூரில் நாடாளுமன்றத் தேர்தல் களம் சூடுபிடிக்கத் தொடங்கியுள்ளது.
இதனிடையே சின்னச்சாமியை தவிர இன்னும் ஒரு சில புதுமுகங்களையும் கரூர் தொகுதியில் களமிறக்க எடப்பாடி பழனிசாமி பரிசீலித்து வருவதாக கூறப்படுகிறது. கரூர் நாடாளுமன்றத் தொகுதியில் கரூர், அரவக்குறிச்சி, கிருஷ்ணராயபுரம், வேடசந்தூர், மணப்பாறை, விராலிமலை ஆகிய 6 சட்டமன்ற தொகுதிகள் வருகின்றன.
Click it and Unblock the Notifications
Sign in with Google