கர்நாடகா: 2 ஆண்டு சிறை, எம்பி. பதவி பறிப்பு- அதே கோலாரில் இன்று ராகுல் காந்தி தேர்தல் பிரசாரம் !
கோலார்: 2 ஆண்டு சிறை தண்டனை பெற்று எம்.பி. பதவியை ராகுல் காந்தி பறிகொடுக்க காரணமான கோலாரில் மூத்த காங்கிரஸ் தலைவர் ராகுல் காந்தி இன்று மீண்டும் தேர்தல் பிரசாரம் செய்கிறார்.
2019-ம் ஆண்டு கோலாரில் ராகுல் காந்தி தேர்தல் பிரசாரம் செய்தார். அப்போது பிரதமர் மோடியை கடுமையாக ராகுல் காந்தி விமர்சித்தார். இதனைத் தொடர்ந்து மோடி சமூகத்தினரை ராகுல் காந்தி அவதூறாக பேசியதாக வழக்கு தொடரப்பட்டது. இந்த வழக்கு திடீரென விசாரிக்கப்பட்டு ராகுல் காந்திக்கு 2 ஆண்டு சிறை தண்டனை விதிக்கப்பட்டது.
லோக்சபா எம்பியான ராகுல் காந்திக்கு 2 ஆண்டு சிறை தண்டனை விதிக்கப்பட்டதால் அவரது எம்பி பதவி பறிக்கப்பட்டது. ராகுல் காந்தி வெற்றி பெற்ற வயநாடு லோக்சபா தொகுதி காலியானதாகவும் அறிவிக்கப்பட்டது. இந்த வழக்கில் ராகுல் காந்தி குஜராத்தின் சூரத் நீதிமன்றத்தில் மேல்முறையீடு மனுவைத் தாக்கல் செய்துள்ளார். இந்த மனு மீது ஏப்ரல் 20-ந் தேதி தீர்ப்பளிக்கப்பட இருக்கிறது.
ராகுல் காந்தியின் எம்பி பதவி பறிப்புக்கு எதிராக நாடு முழுவதும் காங்கிரஸ் கட்சியினர் போராட்டங்களை நடத்தினர். நாடாளுமன்றத்தின் இரு சபைகளும் முடக்கப்பட்டன. ஒட்டுமொத்த எதிர்ககட்சிகளும் காங்கிரஸுக்கு ஆதரவாக ஒன்று திரண்டுள்ளன.
இந்த நிலையில் ராகுல் காந்தியின் எம்பி பதவி பறிக்கப்பட காரணமாக இருந்த அதே கோலாரில் இன்று தேர்தல் பிரசாரம் செய்கிறார். கர்நாடகா சட்டசபைக்கு மே 10-ந் தேதி தேர்தல் நடைபெற உள்ளது. கர்நாடகா தேர்தலில் காங்கிரஸ் மீண்டும் ஆட்சி அமைக்கும் என்பது பொதுவான கருத்து கணிப்பு முடிவுகள். ஆளும் பாஜக மீதான ஊழல் புகார்கள், உட்கட்சி மோதல்கள், சீனியர் தலைவர்கள் ஓரம்கட்டப்படுதல் என பல காரணங்களால் பாஜக ஆட்சியை இழக்கும் எனவும் கூறப்படுகிறது.
இப்பின்னணியில் இன்று கர்நாடகா மாநிலம் பெங்களூர் வருகை தந்தார் ராகுல் காந்தி. அங்கிருந்து கோலார் தொகுதிக்கு சென்று ஜெய் பாரத் பேரணியில் ராகுல் காந்தி பங்கேற்கிறார். இன்று மாலை பெங்களூர் நிகழ்ச்சியில் ராகுல் காந்தி பங்கேற்க உள்ளார். ராகுலின் கர்நாடகா பயணம் மீண்டும் பெரும் எதிர்பார்ப்பை ஏற்படுத்தி உள்ளது.
Click it and Unblock the Notifications
Sign in with Google