அப்பாவுக்கு லேசான மயக்கம் தான்! பயப்பட ஒன்றுமில்லை! பரபரப்பை தணித்த ஐ.பி.செந்தில்குமார் எம்.எல்.ஏ.!

மதுரை: ஊரக வளர்ச்சித்துறை அமைச்சர் ஐ.பெரியசாமி உடல்நலக் குறைவு காரணமாக மதுரை மீனாட்சி மிஷன் மருத்துவமனையில் அனுமதிக்கப்பட்டுள்ள நிலையில் அவரது உடல்நலம் பற்றிய பேச்சு திண்டுக்கல் மாவட்ட திமுகவினரிடையே தீவிரமாக உள்ளது.

இதனிடையே அமைச்சர் ஐ.பெரியசாமிக்கு என்னாச்சு என்பது பற்றி அறிய அவரது மகனும் பழநி சட்டமன்ற தொகுதி உறுப்பினருமான ஐ.பி. செந்தில்குமாரிடம் பேசினோம். அப்போது அவர் கூறியதாவது, '' அப்பாவின் உடல்நலம் பற்றி பயப்பட ஒன்றுமில்லை, சர்க்கரை அளவு லேசாக குறைந்துவிட்டது. இது புதிதல்ல, அவ்வப்போது அவருக்கு வரும் பிரச்சனை தான்.''

''சுகர் லெவலில் ஏற்பட்ட மாறுபாடு காரணமாக வந்த மயக்கமே தவிர வேறு ஒன்றும் பெரிதாக இல்லை. ஓரிரு நாட்களில் மருத்துவமனையிலிருந்து அப்பா வீடு திரும்பி விடுவார்.'' என்று தெரிவித்தார். இதன் மூலம் அமைச்சர் ஐ.பெரியசாமி நலமுடன் இருப்பதையும் ஓரிரு நாட்களில் டிஸ்சார்ஜ் செய்யப்படலாம் என்பதையும் அவரது மகன் ஐ.பி.செந்தில்குமார் எம்.எல்.ஏ. உறுதிப்படுத்தியுள்ளார்.

இதனால் அமைச்சர் ஐ.பெரியசாமியின் உடல்நலம் குறித்த பேச்சுக்கு முற்றுப்புள்ளி வைத்திருக்கிறார். அமைச்சரை பார்க்க வேண்டும் என்ற ஆர்வத்தில் மதுரை மீனாட்சி மிஷன் மருத்துவமனைக்கு சென்ற கட்சிக்காரர்களுக்கு நேற்றும், இன்றும் அனுமதி தரப்படவில்லை. நாளை ஒரு வேளை அனுமதி கொடுக்கப்படலாம். குடும்ப உறுப்பினர்களுக்கே இன்று தான் அனுமதி தரப்பட்டது என்பது குறிப்பிடத்தக்கது.

இதற்கான காரணம் பற்றி மருத்துவமனை வட்டாரத்தில் விசாரித்த போது, ஓய்வெடுக்கும் போது அமைச்சரை யாரும் தொந்தரவு செய்ய வேண்டாம் என்பதே காரணம் தவிர வேறு ஒன்றுமல்ல என பதில் கிடைத்தது.

இதனிடையே அமைச்சர் ஐ.பெரியசாமியை பொறுத்தவரை அவருக்கு உடல்நலக் குறைவு ஏற்பட்டால் எப்போதுமே மதுரை மீனாட்சி மிஷன் மருத்துவமனையில் தான் சிகிச்சை பெறுவார் என்பது குறிப்பிடத்தக்கது. முதலமைச்சர் ஸ்டாலினுக்கும் அமைச்சர் ஐ.பெரியசாமிக்கும் ஒரே வயது என்பதும் ஸ்டாலினை விட மூன்று மாதம் மூத்தவர் என்பதும் குறிப்பிடத்தக்கது.

English summary

Rural Development Minister I.Periyaswamy has been admitted to Meenakshi Mission Hospital in Madurai due to ill health, and the discussion about his health is intense among the DMK members of Dindigul district.