9 முறை அதிமுக வென்ற ஆண்டிபட்டியில் தினகரன் போட்டி? அதிமுகவுக்கு சவால்விடுகிறாரா?

Published: Sunday, February 14, 2021, 15:34 [IST]

Subscribe to Oneindia Tamil

ஆண்டிபட்டி: அதிமுகவின் கோட்டையான ஆண்டிபட்டி சட்டசபை தொகுதியில் அமமுக பொதுச்செயலாளர் டிடிவி தினகரன் போட்டியிடக் கூடும் என கூறப்படுகிறது. டிடிவி தினகரன் போட்டியிடலாம் என்பதால் அமமுகவினர் தேர்தல் பணிகளில் படுதீவிரமாக உள்ளனர்.

சட்டசபை தேர்தலுக்குள் அமமுக- அதிமுக இணையாது என்பதாகவே களநிலவரம் உள்ளது. இதனால்தான் தினகரன், தாம் ஆர்.கே. நகர் மற்றும் தேனிமாவட்ட தொகுதி ஒன்றில் போட்டியிடப் போவதாக அறிவித்திருக்கிறார்.

அதிமுக கோட்டை

தேனி மாவட்டத்தைப் பொறுத்தவரையில் ஆண்டிபட்டி தொகுதிதான் அதிமுகவின் கோட்டையாக இருக்கிறது. இந்த தொகுதியில் 9 முறை அதிமுக வெற்றி பெற்றிருக்கிறது.

எஸ்.எஸ்.ஆர்- எம்ஜிஆர்-ஜெ.

1980-ல் நடிகர் எஸ்.எஸ்.ராஜேந்திரன், 1984-ல் எம்ஜிஆர், 2002, 2006-ல் ஜெயலலிதா ஆகியோர் வெற்றி பெற்ற தொகுதி இது.

3 முறை வென்ற தங்க தமிழ்ச்செல்வன்

இந்த தொகுதியில் தங்க தமிழ்ச்செல்வன் அதிமுக வேட்பாளராக 3 முறை களம் கண்டு வாகை சூடினார். தினகரனோடு இருந்த தங்க தமிழ்ச்செல்வன் இப்போது திமுகவில் இருக்கிறார். இருந்த போதும் அதிமுக வாக்கு வங்கி வலிமையாக இருக்கிறது என்கிறார்கள் கள நிலவரம் அறிந்தவர்கள். இதனால்தான் தினகரன் இந்த தொகுதியை தேர்ந்தெடுத்திருப்பதாகவும் கூறப்படுகிறது.

தினகரன் கணக்கு

ஆண்டிபட்டியில் போட்டியிட்டு வெற்றி பெற்றால் அதிமுக தலைமைக்கு தமது வலிமையை காட்டலாம் என்பதும் தினகரனின் கணக்காம். டிடிவி தினகரன், ஆண்டிபட்டியில் போட்டியிடுவார் என்பதால் அமமுகவினர் இப்போதே தேர்தல் பணிகளில் படுதீவிரமாக இருக்கிறார்களாம்.

Published On February 14, 2021