அடேங்கப்பா! முதல்வராக விஜய்.. கூட்டணி கட்சியினர் வாழ்த்தாம்.. பின்னாடி அண்ணாமலையை பார்த்தீங்களா?

மதுரை: போஸ்டர் அடிப்பதில் மதுரைக்காரர்களை அடித்துக்கொள்ள ஆளே கிடையாது. அப்படி பரபர போஸ்டர்களுக்கு பெயர்போன மதுரையில் விஜய் ரசிகர்கள் செய்துள்ள லேட்டஸ்ட் சம்பவம் பெரும் பரபரப்பை ஏற்படுத்தியுள்ளது.

விஜய் நடிப்பில், லோகேஷ் கனகராஜ் இயக்கத்தில் தயாராகி இருக்கும் 'லியோ' திரைப்படம் இந்த மாதம் வெளியாக இருக்கிறது. விஜய் ரசிகர்கள் இந்தப் படத்தின் ஆடியோ வெளியீட்டு விழாவிற்காக ஆவலாக காத்திருந்த நேரத்தில் திடீரென ஆடியோ ரிலீஸ் நிகழ்ச்சி ரத்து செய்யப்பட்டது. இசை வெளியீட்டு விழாக்களில் விஜய் சொல்லும் குட்டிக்கதை, அரசியல் பஞ்ச்கள் பரபரப்பைக் கிளப்பும். இச்சூழலில் ஆடியோ லாஞ்ச் நிகழ்ச்சி ரத்தானதால் ரசிகர்கள் ஏமாற்றமடைந்தனர்.

லியோ ஆடியோ வெளியீட்டு விழா ரத்து செய்யப்பட்டதற்கு அரசியல் காரணங்கள் இருக்கலாம் என்கிற ரீதியில் விவாதங்கள் எழுந்து வருகின்றன. ஆடியோ ரத்து அறிவிப்பில் அரசியல் அழுத்தம் ஏதும் இல்லை என தயாரிப்பு நிறுவனம் ட்விட்டரில் தெரிவித்திருந்தது. ஆனாலும், விஜய் ரசிகர்கள், ஆளும் கட்சியை சீண்டும் வகையில் ட்விட்டரில் கருத்துகளைப் பதிவிட்டு வருகின்றனர். இந்நிலையில், மதுரை விஜய் ரசிகர்கள் வித்தியாசமாக யோசித்து ஒரு போஸ்டரை ஒட்டி பரபரப்பைக் கிளப்பியுள்ளனர்.

விஜய் அரசியல் என்ட்ரி தொடர்பாக தீவிரமாக விவாதிக்கப்பட்டு வரும் நிலையில் இந்தச் சூட்டை அதிகப்படுத்தும் விதமாக மதுரையில் போஸ்டர்களை ஒட்டி அதகளம் செய்துள்ளனர் மதுரை தெற்கு மாவட்ட விஜய் மக்கள் இயக்கத்தினர். தினத்தந்தி செய்தித்தாள் வடிவில் விஜய் ரசிகர்கள் மதுரையில் ஒட்டியுள்ள போஸ்டர் பரபரப்பை ஏற்படுத்தியுள்ளது.

அதில் விஜய் தலைமையில் டி.டி.வி.தினகரன், அன்புமணி ராமதாஸ், ஓ.பன்னீர்செல்வம், அண்ணாமலை, ஜான்பாண்டியன் ஆகிய அரசியல் கட்சித் தலைவர்கள் நடிகர் விஜய்க்கு பொன்னாடை அணிவித்து வாழ்த்து தெரிவிக்கும் வகையில் எடிட் செய்துள்ளனர். கூட்டணி கட்சித் தலைவர்கள் நேரில் சந்தித்து விஜய்க்கு வாழ்த்து தெரிவித்துள்ளனர் என்றும் குறுப்பிடப்பட்டுள்ளது.

அதே போல், பிரதமர் மோடி, சட்டமன்றத் தேர்தலில் விஜய் வெற்றி பெற்றதற்கு வாழ்த்து தெரிவித்ததாகவும். பதவி ஏற்பு விழாவில் பங்கேற்க பிரதமர் மோடி தமிழகம் வர உள்ளதாகவும், தமிழகம் முழுவதும் பட்டாசு வெடித்து இனிப்பு வழங்கி தொண்டர்கள் உற்சாகம் என செய்தி போல சித்தரித்து போஸ்டரில் குறிப்பிட்டுள்ளனர். இந்த போஸ்டர் மதுரை மட்டுமல்லாது தமிழ்நாடு முழுவதும் பரபரப்பை ஏற்படுத்தியுள்ளது.

விஜய் அரசியலுக்கு வரப்போகிறார் என்ற தகவல் பல மாதங்களாகவே வட்டமடிக்கிறது. நலத்திட்ட உதவிகள் வழங்கும் விழா, மாணவர்களுக்கு பரிசு என விஜய்யின் நகர்வுகளும் அதை நோக்கியே இருப்பதாக கூறப்படுகிறது. நாடாளுமன்றத் தேர்தலுக்கு இன்னும் சில மாதங்களே உள்ள நிலையில் விஜய் மக்கள் இயக்கத்தினரின் செயல்பாடுகள் ஒவ்வொன்றையும் அரசியல் கட்சிகள் கூர்ந்து கவனித்து வருகின்றன.

இந்நிலையில், விஜய் ரசிகர்களின் இந்த போஸ்டர்கள் பரபரப்பை ஏற்படுத்தி வருகின்றன. அதிலும் குறிப்பாக பாஜக, அமமுக, பாமக, ஓபிஎஸ் அணி அதிமுக உள்ளிட்ட கட்சிகளோடு கூட்டணி அமைத்து தேர்தலைச் சந்தித்து வெற்றி பெற்று ஆட்சியமைக்கப் போவதாக விஜய் ரசிகர்கள் போஸ்டர் ஒட்டியுள்ளது அனைவரையும் திரும்பிப் பார்க்க வைத்துள்ளது. தங்களது கனவை வெளிப்படுத்தும் விதமாக ரசிகர்கள் ஒட்டியுள்ளனர். ஆனால், கனவா இருந்தாலும் ஒரு நியாயம் வேணாமா?

English summary

The latest poster by Vijay fans in Madurai, has created a lot of sensation. The poster depicts Annamalai, O Panneerselvam, Anbumani ramadoss congratulates Vijay for his victory in assembly election.