அஜித் பவார் தேசியவாத கட்சியில் இணைந்த சினிமா பாரதியார் ஷாயாஜி ஷிண்டே.. மகாராஷ்டிரா தேர்தலில் போட்டி?
மும்பை: மகாராஷ்டிரா சட்டசபை தேர்தல் நெருங்கும் நிலையில் திரைப்படங்களில் மகாகவி பாரதியாராக, அரசியல்வாதியாக நடித்த நடிகர் ஷாயாஜி ஷிண்டே, அஜித் பவார் முன்னிலையில் தேசியவாத காங்கிரஸ் கட்சியில் இணைந்தார். இதனைத் தொடர்ந்து மகாராஷ்டிரா சட்டசபை தேர்தலில் ஷாயாஜி ஷிண்டே போட்டியிடுவாரா? என்கிற எதிர்பார்ப்பு எழுந்துள்ளது.
தமிழில் பாரதியார் திரைப்படத்தில் பாரதியாராக நடித்து தமிழ் ரசிகர்களுக்கு அறிமுகமானவர் ஷாயாஜி ஷிண்டே. தமிழ், தெலுங்கு, இந்தி மொழிகளில் பல திரைப்படங்களில் அரசியல்வாதியாக, குணசித்திர நடிகராக பல்வேறு முகம் காட்டி நடிப்பைக் கொட்டியவர் ஷாயாஜி ஷிண்டே.
பொதுவாக மாநிலங்களில் சட்டசபை தேர்தல் நடைபெறும் போதும், லோக்சபா தேர்தலின் போதும் நடிகர்கள் அரசியல் கட்சிகளைத் தொடங்குவதும் கட்சிகளில் இணைவதும் தொடர்ந்து கொண்டுதான் இருக்கிறது. 2026 தமிழக சட்டசபை தேர்தலை இலக்கு வைத்து தமிழ்நாட்டில் நடிகர் விஜய் கட்சியைத் தொடங்கி இருக்கிறார்.
இந்த வரிசையில் மகாராஷ்டிரா சட்டசபை தேர்தல் அடுத்த மாதம் நடைபெறும் நிலையில் நடிகர் ஷாயாஜி ஷிண்டே நிஜ அரசியல்வாதியாகிவிட்டார். மும்பையில் மகாராஷ்டிரா துணை முதல்வர் அஜித் பவார் தலைமையில் தம்மை தேசியவாத காங்கிரஸ் கட்சியில் ஷாயாஜி ஷிண்டே இணைத்துக் கொண்டார்.
அஜித்பவாரின் தேசியவாத காங்கிரஸ் கட்சி, பாஜக தலைமையிலான மகாயுதி கூட்டணியில் இடம் பெற்றுள்ளது. ஏக்நாத் ஷிண்டே சிவசேனா, பாஜக, அஜித்பவார் தேசியவாத காங்கிரஸ் கட்சி இடையே தொகுதிப் பங்கீட்டு பேச்சுவார்த்தை மற்றும் முதல்வர் வேட்பாளர் யார் என்பது குறித்து தீவிரப் பேச்சுவார்த்தை நடைபெற்று வருகிறது. இந்த கூட்டணியில் அஜித்பவார் கட்சிக்கு குறைவான தொகுதிகள்தான் ஒதுக்கப்படும் நிலை இருக்கிறது.
இந்த நிலையில் அஜித்பவாரின் தேசியவாத காங்கிரஸில் நடிகர் ஷாயாஜி ஷிண்டே இணைந்திருக்கிறார். மகாராஷ்டிரா சட்டசபை தேர்தலில் ஷாயாஜி ஷிண்டே வேட்பாளராக களம் இறங்கவும் வாய்ப்புகள் இருக்கிறதா? என்பது பெரும் எதிர்பார்ப்பாக இருக்கிறது.
மகாராஷ்டிரா மாநிலத்தின் மேற்கு பகுதி மாவட்டமான சதாராவில் பிறந்த ஷாயாஜி ஷிண்டே மராத்திய மொழி நடிகராக அறிமுகமானார். 1999-ல் Shool இந்தி மொழி திரைப்படத்தில் வில்லனாக நடித்தது பெருமளவு பேசப்பட்டது. இதன் பின்னரே தென்னிந்திய மொழிகள், குஜராத்தி மற்றும் போஜ்புரி மொழிகளிலும் கொடி கட்டிப் பறந்தார் ஷாயாஜி ஷிண்டே.
Click it and Unblock the Notifications
Sign in with Google