பெண்களுக்கு மாதம் ரூ.3000! மகாராஷ்டிராவில் தேர்தல் வாக்குறுதிகளை அறிவித்தது காங்கிரஸ் கூட்டணி

மும்பை: மகாராஷ்டிரா மாநிலத்தில் விரைவில் சட்டப்பேரவை தேர்தல் நடைபெற இருக்கிறது. இந்நிலையில் காங்கிரஸ், உத்தவ் சிவசேனா, சரத்பவாரின் தேசியவாத காங்கிரஸ் கூட்டணியான, மகாவிகாஸ் அகாடி தேர்தல் அறிக்கையை வெளியிட்டிருக்கிறது. இதில், மகாவிகாஸ் அகாடி ஆட்சிக்கு வந்தால் பெண்களுக்கு மாதம் ரூ.3000 உதவித்தொகையும், வேலையில்லா இளைஞர்களுக்கு மாதம் ரூ.4000 உதவித் தொகையும் வழங்கப்படும் என தெரிவிக்கப்பட்டிருக்கிறது.

மகாராஷ்டிரா தேர்தல் தேசிய அரசியலில் மிக முக்கியமானதாக பார்க்கப்படுகிறது. இங்கு சிவசேனா தொடக்கத்திலிருந்து ஆதிக்கம் செலுத்தி வருகிறது. இக்கட்சியுடன் கைகோர்த்து ஆட்சியை கைப்பற்ற பாஜக முயன்ற நிலையில், அதற்கு சிவசேனா ஒத்து வரவில்லை. எனவே ஷிண்டே தலைமையில் சில எம்எல்ஏக்கள் பிரிந்து பாஜகவில் இணைய.. பெரும்பான்மையை இழந்த சிவசேனா அரசு வீழ்ந்தது. இதனையடுத்து நாங்கள்தான் உண்மையான சிவசேனா என ஷிண்டே தரப்பு உரிமை கோர, கட்சி இரண்டாக உடைந்தது. சரத் பவார் தலைமையிலான தேசியவாத காங்கிரசுக்கும் இதே நிலைமைதான்.

இப்போது உத்தவ் தலைமையில் இருக்கும் சிவசேனாவும், சரத்பவார் தலைமையிலான தேசியவாத காங்கிரசும், காங்கிரஸ் கட்சியுடன் கைகோர்த்து சட்டமன்ற தேர்தலை எதிர்கொண்டிருக்கிறது. இந்நிலையில் தேர்தல் வாக்குறுதியை இக்கூட்டணி வெளியிட்டிருக்கிறது. இதில்,

பெண்களுக்கு மாதம் ரூ.3000 உதவித்தொகை

இலவச பேருந்து பயணம்

ரூ.3 லட்சம் வரை விவசாய கடன் தள்ளுபடி

விவசாய கடனை முறையாக செலுத்துபவர்களுக்கு ரூ.50,000 ஊக்கத்தொகை

வேலையில்லாத இளைஞர்களுக்கும் மாதம் ரூ.4,000 உதவித்தொகை

ரூ.25 லட்சம் வரை சுகாதார காப்பீடு

போன்ற வாக்குறுதிகள் மிகுந்த கவனம் பெற்றிருக்கின்றன. தெலங்கானா மற்றும் கர்நாடகாவில் இதே போன்ற வாக்குறுதிகள் மக்களை வெகுவாக ஈர்த்தருந்தன. எனவே, இந்த பணியை பின்பற்றி மகாராஷ்டிராவில் மீண்டும் ஆட்சியை பிடிக்க மகா விகாஸ் கூட்டணி முயன்று வருகிறது. வாக்குறுதிகளை வெளியிடும்போது பேசிய ராகுல் காந்தி, இடஒதுக்கீடு உச்சவரம்பு 50% என்பதை நிச்சயம் தகர்ப்போம் என்று கூறியுள்ளார்.

ஏற்கெனவே கடந்த நாடாளுமன்ற தேர்தலில் இக்கூட்டணிக்கு அதிக தொகுதிகள் கிடைத்திருந்தன. எனவே, எதிர் வரும் சட்டப்பேரவை தேர்தலிலும் வெற்றி கிடைக்கும் என்று மகாவிகாஸ் கூட்டணி நம்பிக்கை தெரிவித்திருக்கிறது.

English summary

Maharashtra is going to hold assembly elections soon. In this context, the Maha Vikas Aghadi, the alliance of Congress, Uddhav Shiv Sena and Sharad Pawar's Nationalist Congress Party, has released its election manifesto. In it, it has been stated that if the Maha Vikas Aghadi comes to power, a monthly allowance of Rs. 3000 will be given to women and Rs. 4000 to unemployed youth.