வாடகை மட்டும் ரூ.38 கோடி.. மும்பையில் டெஸ்லாவின் முதல் ஷோரூம்.. ஆட்டத்தை ஆரம்பித்த எலான் மஸ்க்!

மும்பை: உலக பணக்காரர்களில் ஒருவரான எலான் மஸ்கின் டெஸ்லா கார் நிறுவனம் இந்தியாவில் தனது முதல் ஷோரூமை மும்பையில் ஜூலை 15ஆம் தேதி திறக்க உள்ளது. அதுமட்டுமல்லாமல் ஷோரூம் திறக்கப்பட்ட ஒரு மாதத்திலேயே தனது முதல் காரினை ஆகஸ்ட் மாதத்திலேயே டெலிவரி செய்ய திட்டமிட்டிருக்கிறது. இதற்காக சீனாவில் உள்ள டெஸ்லா ஆலையில் இருந்து Y SUV ரக கார்களை இந்தியாவுக்கு கொண்டு வந்துள்ளதாக தகவல் கிடைத்துள்ளது.

ஆட்டோமொபைல் துறையில் அமெரிக்கா, சீனா ஆகிய நாடுகளுக்கு அடுத்ததாக இந்தியா உள்ளது. இதன் காரணமாக இந்தியாவிலும் டெஸ்லா கார் ஷோரூமை உலக பணக்காரர்களில் ஒருவரான எலான் மஸ்க் தொடங்க உள்ளார். ஜூலை 15ஆம் தேதி மும்பையில் உள்ள குர்லா பகுதியில் டெஸ்லா ஷோரூம் திறக்கப்படவுள்ளது. இதே பகுதியில்தான் ஆப்பிள் நிறுவனத்தின் ஷோரூம் செயல்பட்டு வருகிறது.

மும்பை விமான நிலையம் அருகில் இருப்பதால், டெஸ்லா நிறுவனம் இந்த பகுதியை தேர்வு செய்துள்ளதாக தெரிகிறது. டெஸ்லா ஷோரூம் தொடங்கப்பட்ட பின், அடுத்த வாரம் முதல் வாடிக்கையாளர்கள் டெஸ்லா எலக்ட்ரிக் கார்களை ஆர்டர் செய்யலாம் என்று தகவல் தெரிய வந்துள்ளது. இந்த ஷோரூமின் முதல் வாரத்தில் விஐபி-க்கள் மற்றும் தொழில் பங்குதாரர்கள் மட்டுமே பார்வையிட முடிவு எடுக்கப்பட்டுள்ளது.

பொதுமக்கள் அடுத்த வாரம் முதல் டெஸ்லா ஷோரூமை பார்க்கலாம். அதேபோல் டெஸ்லா நிறுவனத்தின் முதல் பேட்ச் கார்கள் ஏற்கனவே சீனா ஆலையில் இருந்து இந்தியாவுக்கு இறக்குமதி செய்யப்பட்டுவிட்டன. சீனாவில் இருந்து y suv ரக கார்கள் கொண்டு வரப்பட்டுள்ளன. இதனால் ஆகஸ்ட் கடைசி வாரம் முதல் டெஸ்லா கார்கள் டெலிவரி செய்யப்படும் என்று எதிர்பார்க்கப்படுகிறது.

மும்பையில் அமைக்கப்பட்டுள்ள டெஸ்லா ஷோரூமை 5 ஆண்டுகளுக்கு ஒப்பந்த முறையில் வாடகைக்கு எடுக்கப்பட்டுள்ளது. மொத்தமாக 4,003 சதுர அடியில் இந்த டெஸ்லா ஷோரூம் அமைந்திருக்கிறது. இதன்படி ஆண்டுக்கு ரூ.38.87 கோடி வாடகையாக நிர்ணயம் செய்யப்பட்டுள்ளது. அதேபோல் மும்பையை தொடர்ந்து டெல்லியில் டெஸ்லா நிறுவனம் ஷோரூமை தொடங்க திட்டமிட்டுள்ளது.

இந்த நிலையில் டெஸ்லா நிறுவனம் தனது முதல் ஷோரூமை திறக்க உள்ளதையொட்டி அதன் எக்ஸ் பக்கத்தில், மும்பை நகரின் புகைப்படத்தை வெளியிட்டு டெஸ்லா, இந்தியா என்று பதிவிட்டுள்ளது. அமெரிக்கா அதிபர் டொனால்ட் டிரம்ப் அமெரிக்கா நிறுவனங்கள் முதலீடு செய்வதை எதிர்த்து வரும் நிலையில், ஆப்பிள் நிறுவனத்தை தொடர்ந்து டெஸ்லா நிறுவனமும் இந்தியாவில் கால் பதித்திருப்பது விவாதமாகி வருகிறது.

English summary

Tesla, led by Elon Musk, will open its first Indian showroom in Mumbai on July 15, with deliveries of its Model Y SUV expected to begin in August, sourced from its China factory