செத்தாலும் சடலம் கூட பாஜக பக்கம் போகாது.. குமாரசாமிக்கு கர்நாடகா முதல்வர் சித்தராமையா பளீர் பதிலடி!

மைசூர்: மதவாதிகளை எதிர்த்து காலந்தோறும் போராடுகிற என்னுடைய சடலம் கூட பாஜக பக்கம் போகாது என முன்னாள் முதல்வரும் மதச்சார்பற்ற ஜனதா தளத்தின் தலைவருமான குமாரசாமிக்கு கர்நாடகா முதல்வர் சித்தராமையா பதிலடி கொடுத்துள்ளார்.

மதச்சார்பற்ற ஜனதா தளம் கட்சியில் இருந்து பல ஆண்டுகளுக்கு முன்னர் வெளியேறி காங்கிரஸ் கட்சியில் இணைந்தார் சித்தராமையா. அப்போது பாஜகவில் இணைய சித்தராமையா முயற்சித்தார் என குமாரசாமி கூறி இருந்தார்.

இது தொடர்பாக மைசூரில் செய்தியாளர்கள் கேட்ட கேள்விக்கு சித்தராமையா அளித்த பதில்: மதச்சார்பற்ற ஜனதா தளம் கட்சியில் இருந்து விலகிய போது பாஜகவில் சேர அத்வானியுடன் பேச்சுவார்த்தை நடத்தினேன் என குமாரசாமி கூறுகிறார். என் அரசியல் வாழ்க்கையில் மதவாத சக்திகளுக்கு எதிரான போராட்டமே தொடருகிறது. அப்படி நான் இறந்தாலும் என் உடல் கூட பாஜக பக்கம் போகாது.

மத வன்முறைகளைத் தூண்டுகிற பாஜக பக்கம் நான் போகிறேன் என்றால் நம்பவா முடியும்? டெல்லியில் அமித்ஷா உள்ளிட்டோரை சந்திக்கிறேன் எனில் உடனே பாஜகவில் சேருவதாக சொல்லவா முடியும்? அத்வானியை சந்தித்து நலம் விசாரித்த காரணத்தால் பாஜகவில் சேர முயற்சித்தேன் என்பது எல்லாம் அபத்தம்.

ஜனநாயக நாட்டில் அனைவரும் போராட்டங்கள் நடத்தலாம். கர்நாடகாவில் தனியார் வாகன உரிமையாளர்கள் அமைதி வழியில் போராட்டம் நடத்தலாம். அவர்களது நியாயமான கோரிக்கைகள் முன்வைக்கப்பட்டால் அது குறித்து பேச்சுவார்த்தை நடத்தி தீர்வும் காணலாம். இவ்வாறு சித்தராமையா கூறினார்.

English summary

Karnataka CM Siddaramaiah said that even my dead body will not join BJP.