திருநங்கைகளை ஆண்கள் சிறையில் அடைக்கும் அமெரிக்கா.. டிரம்ப் போட்ட அதிரடி உத்தரவால் அதிர்ச்சி

நியூயார்க்: அமெரிக்காவில் இனி ஆண், பெண் என்கிற இரண்டு பாலினங்கள்தான் அங்கீகரிக்கப்படும் என அதிபர் டிரம்ப் அதிரடியாக உத்தரவிட்டிருந்தார். இந்நிலையில், தனி சிறையில் உள்ள திருநங்கைகளை ஆண்கள் சிறையில் அடைக்கவும் ஆர்டர் போட்டியிருக்கிறார். இது கடும் விமர்சனங்களை ஏற்படுத்தியுள்ளது.

தேர்தல் பிரசாரங்களின்போதே டிரம்ப் மாற்று பாலினத்தவர்கள் குறித்து பேசியிருந்தார். நான் ஆட்சிக்கு வந்தால், ஆண் மற்றும் பெண் என்கிற இரண்டு பாலினங்கள்தான் இருக்கும் என்று கூறியிருந்தார். அதபோல ஆட்சிக்கு வந்தவுடன், தற்போது திருநங்கைகளை ஆண்கள் சிறைக்கு மாற்ற உத்தரவிட்டிருக்கிறார். சுமார் 2500க்கும் அதிகமான திருநங்கைகள் அமெரிக்கா முழுவதும் சிறைகளில் அடைக்கப்பட்டிருப்பதாக சொல்லப்பட்டிருக்கிறது. இவர்கள் அனைவரும் ஆண்கள் சிறைக்கு மாற்றப்பட்டு வருகிறார்கள்.

டிரம்ப் பிறப்பித்த உத்தரவு சிறைதுறை மட்டுமல்லாது, பொது உரிமைகள் காப்பு, நிதி ஒதுக்கீடு, பாஸ்போர்ட், விசா சேவை உள்ளிட்டவற்றிலும் மாற்று பாலினத்தவர்களுக்கு எதிரான தாக்கத்தை ஏற்படுத்தும். சர்வதேச அளவில் ஏறத்தாழ அனைத்து நாடுகளும் மாற்று பாலினம் குறித்து ஏற்றுக்கொண்டிருக்கின்றன. இந்தியாவில் கூட மாற்று பாலினத்தவர்களுக்கான உரிமைகள் அங்கீகரிக்கப்பட்டிருக்கிறது. ஆனால், உலகின் மிகவும் பலம் வாய்ந்த ஜனநாயக நாடாக கருத்தப்படும் அமெரிக்காவில் இதற்கு எதிர்ப்பு எழுந்திருப்பது விமர்சனங்களை கிளப்பியிருக்கிறது.

டிரம்ப்பின் உத்தரவால் தற்போது, அமெரிக்க ராணுவத்தில் உள்ள மாற்று பாலின வீரர்களும் விரைவில் வெளியேற்றப்பட இருக்கிறார்கள். அமெரிக்க ராணுவ சேவையில் சுமார் 15,000 மாற்று பாலின வீரர்கள் இருக்கிறார்கள். இவர்களை அனைவரும் உடற்தகுதி நீக்கம் என்று முத்திரை குத்தப்பட்டு வெளியேற்றப்படுவார்கள் என்று சொல்லப்படுகிறது. மட்டுமல்லாது, இனி வரும் நாட்களில் LGBTQ+ சமூகத்தை சேர்ந்தவர்களை ராணுவத்தில் சேர்க்க தடையும் விதிக்கப்படும்.

கடந்த 2017-2021 காலத்தில் டிரம்ப் அதிபராக இருந்தபோதே இது குறித்த உத்தரவு பிறப்பிக்கப்பட்டிருந்தது. ஆனால் அது இவ்வளவு கராறாக அமல்படுத்தப்படவில்லை. மட்டுமல்லாது, இவருக்கு அடுத்து ஆட்சி அதிகாரத்திற்கு வந்த பைடன், டிரம்பின் உத்தரவை நீக்கி அதிரடி காட்டினார். டிரம்ப் கொண்டுவந்த ஏராளமான பழமைவாத உத்தரவுகள் அனைத்தும் ரத்து செய்யப்பட்டிருந்தன. ஆனால் இந்த முறை, தன்னுடைய உத்தரவுகள் அனைத்தும் உடனடியாக அமல்படுத்தப்பட வேண்டும் என்பதில் டிரம்ப் கவனமாக இருக்கிறார்.

பாலினம் குறித்த உத்தரவு மட்டும்தான் சர்ச்சையா? என்று கேட்டால் கிடையாது. வேறு சில உத்தரவுகளும் சர்ச்சைகளை கிளப்பியிருக்கிறது. குறிப்பாக அமெரிக்காவில் உள்ள வெளிநாட்டவர்களுக்கான குடியுரிமையை நீட்டிப்பதில் பிறப்பிக்கப்பட்ட கட்டுப்பாடுகள், சட்டவிரோதமாக அமெரிக்காவில் நுழைபவர்களை அகதிகளாக நடத்தாமல், குற்றவாளிகளாக நடத்துவது, அதேபோல கல்விக்காக அமெரிக்கா வந்துள்ள மாணவர்கள், கல்வியில் மட்டும் கவனம் செலுத்த வேண்டும், தவிர பார்ட் டைம் வேலைகளில் ஈடுபட்டால் கல்விக்கான விசாவை ரத்து செய்வது என டிரம்ப் அதிரடிக்கு மேல், அதிரடி காட்டி வருகிறார்.

இப்படி இருக்கையில் திருநங்கைகள் குறித்து அவர் பிறப்பித்துள்ள உத்தரவு சர்வதேச அளவில் விமர்சனங்களை பெற்று வருகிறது.

English summary

President Trump has dramatically ordered that only two genders, male and female, will be recognized in the United States. In this context, he has also ordered that transgender people who are in separate prisons be held in men's prisons. This has drawn severe criticism.