பீகாரில் மீண்டு எழுமா ஆர்ஜேடி? கட்சியை காப்பாற்றுவாரா தேஜஸ்வி! வரலாற்று பாடம் சொல்வது என்ன?
பாட்னா: பீகார் மாநிலத்தில் இரண்டு கட்டங்களாக சட்டப்பேரவை தேர்தல் நடத்தப்படும் என்று இந்திய தேர்தல் ஆணையம் அறிவித்திருக்கிறது. கடந்த 20 ஆண்டுகளாக முதல்வராக இருக்கும் நிதிஷ்குமாருக்கும், 20 ஆண்டுகளாக ஆட்சி அதிகாரத்தை பறிகொடுத்து நிற்கும் ராஷ்ட்ரிய ஜனதா தளம் (ஆர்ஜேடி) கட்சிக்கும் இந்த தேர்தல் முக்கியமானது. இந்த தேர்தலில் ஆர்ஜேடி மீண்டு வருமா என்பது கேள்வியாக இருக்கிறது.
கடந்த 2000 முதல் 2010 வரை ஆர்ஜேடி சந்தித்த தொடர் வீழ்ச்சியின் பின்னணியில், 2015 சட்டப்பேரவைத் தேர்தலில் ஐக்கிய ஜனதா தளம் கட்சியுடன் கூட்டணி வைத்து, நிதீஷ் குமாரின் தலைமையை ஏற்றுக்கொண்டது. லாலு பிரசாத் யாதவ் மற்றும் அவரது ராஷ்ட்ரிய ஜனதா தளத்தின் அரசியல் எழுச்சி, வீழ்ச்சி, மற்றும் குழப்பங்கள் இந்திய அரசியலில் முக்கியமானவை. லாலு பிரசாத் பீகாரில் 15 ஆண்டுகள் அதிகாரத்தைக் கட்டுப்படுத்தினார். இதில் ஏழு ஆண்டுகள் முதலமைச்சராகவும், 1997-ல் தீவன ஊழல் வழக்கில் கைதாகிய பிறகு, அவரது மனைவி ராப்ரி தேவியை முதலமைச்சராக்கி எட்டு ஆண்டுகள் அதிகாரத்தில் இருந்தார்.
இந்தத் தகவல்கள் அடிப்படையாக கொண்டு பார்க்கும்போது, லாலுவும் அவரது கட்சியும் பீகாரில் அபரிமிதமான ஆதரவைப் பெற்றிருந்ததாகத் தோன்றலாம். ஆனால், அடிப்படை தேர்தல் புள்ளிவிவரங்கள் இதற்கு முரணாக உள்ளன. லாலுவின் அரசியல் உச்சம் 1995-ல் ஏற்பட்டது. இந்த ஒரே தேர்தலில்தான் அவரது கட்சி பீகாரில் தனிப்பெரும்பான்மையைப் பெற்றது. 2010-ஆம் ஆண்டில், ஐக்கிய ஜனதா தளம் மற்றும் பாரதிய ஜனதா கட்சியின் தேசிய ஜனநாயகக் கூட்டணி 84.8% இடங்களைப் பெற்று மகத்தான வெற்றி பெற்றது. அப்போது, ஆர்ஜேடியின் தேர்தல் பலம் வெகுவாகக் குறைந்து வெறும் 9.1% இடங்களைப் பெற்றது.
2000 மற்றும் 2010-க்கு இடையில் ராஷ்ட்ரிய ஜனதா தளம் சந்தித்த தொடர்ச்சியான சரிவின் பின்னணியில், 2015 சட்டப்பேரவைத் தேர்தலில் ஐக்கிய ஜனதா தளத்துடன், ராஷ்ட்ரிய ஜனதா தளம் கூட்டணி அமைத்ததும், நிதீஷ் குமாரை முதலமைச்சர் வேட்பாளராக ஏற்றுக்கொண்டதும் பீகார் அரசியலில் கவனிக்கப்பட வேண்டிய ஒன்று. இந்த கூட்டணியின் மூலம் கூட ஆர்ஜேடி தனது வெற்றியை தக்க வைத்துக்கொள்ள முடியவில்லை. ராஷ்ட்ரிய ஜனதா தளம் தற்போது ஒரு பெரிய இக்கட்டான சூழ்நிலையை எதிர்கொண்டுள்ளது. அதன் பாரம்பரிய கூட்டணிக் கட்சிகளான காங்கிரஸ் மற்றும் இடதுசாரிக் கட்சிகள் பீகாரில் ஆட்சிக்கு வர போதுமான பலத்துடன் இல்லை.
மறுபுறம் நிதீஷ் குமாரின் அரசியல் வளர்ச்சி உச்சத்தை எட்டியுள்ளன. உச்சத்தை எட்டிய பின்னர் வீழ்ச்சிதான் ஒரே ஆப்ஷன். 1994-ல் லாலு யாதவ் மற்றும் அவரது அரசியலின் ஆதிக்கத்திற்கு எதிராக நிதீஷ் குமார் ஜனதா தளம் கட்சியில் இருந்து மாறுபட்டார். ஆரம்பத்தில் இடதுசாரிகளுடன் கூட்டணி தேடி, 1995 சட்டப்பேரவைத் தேர்தலில் இந்திய கம்யூனிஸ்ட் கட்சி (மார்க்சிஸ்ட்-லெனினிஸ்ட்) விடுதலை (CPI ML) உடன் போட்டியிட்டார். அதில் மிகவும் மோசமான தோல்வியைச் சந்தித்தார்.
1996 மக்களவைத் தேர்தலில், நிதீஷ் இடதுசாரியில் இருந்து வலதுசாரிக்கு மாறி, பா.ஜ.கவுடன் கூட்டணி சேர்ந்தார். இந்த கூட்டணி 2013 வரை நீடித்தது. 2014 மக்களவைத் தேர்தலில் நரேந்திர மோடியின் பிரதமர் வேட்பாளர் நியமனத்திற்கு எதிர்ப்பு தெரிவித்து தேசிய ஜனநாயகக் கூட்டணியில் இருந்து விலகினார். 2014 மக்களவைத் தேர்தலில், நிதீஷ் குமார் இந்திய கம்யூனிஸ்ட் கட்சியுடன் (CPI) போட்டியிட்டு, வெறும் இரண்டு மக்களவை உறுப்பினர்களை மட்டுமே பெற்றார்.
அதன் பின்னர் மீண்டும் நிலைப்பாட்டை மாற்றி, 2015 சட்டப்பேரவைத் தேர்தலில் ராஷ்ட்ரிய ஜனதா தளம் மற்றும் காங்கிரஸுடன் கூட்டணி அமைத்தது. இந்த கூட்டணி மகத்தான வெற்றியைப் பெற்றது. ஆனால் 2017-ல் கூட்டணி பிரிந்தது. நிதீஷ் மீண்டும் தேசிய ஜனநாயகக் கூட்டணியில் சேர்ந்தார். தேசிய ஜனநாயகக் கூட்டணி 2019 மக்களவைத் தேர்தலில் மாநிலத்தில் உள்ள 40 நாடாளுமன்றத் தொகுதிகளில் 39-ல் வெற்றி பெற்றது.
இருப்பினும், 2020 சட்டப்பேரவைத் தேர்தல் நிதிஷ்குமாரின் கட்சிக்கு பெரும் பின்னடைவாக அமைந்தது. 2005-க்கு பிறகு பீகார் சட்டப்பேரவையில் அது மிக மோசமான செயல்பாட்டை பதிவு செய்தது. 2020 தேர்தலில் வீழ்ச்சிக்கு முக்கிய காரணம், தேசிய ஜனநாயகக் கூட்டணியில் அங்கம் வகித்த லோக் ஜனசக்தி கட்சி (LJP), மத்திய கூட்டணியில் இருந்தபோதிலும், பீகார் தேர்தலில் ஜே.டி(யு) மற்றும் நிதீஷ் குமார் மீது கடுமையான தாக்குதல்களை நடத்தியதுதான்.
இந்த பின்னணியில்தான் தற்போது சட்டமன்ற தேர்தல் நடக்கிறது. இதில் நிதிஷ்குமாரை, தேஜஸ்வி யாதவ் வீழ்த்துவாரா? என்று எதிர்பார்ப்புகள் எழுந்திருக்கின்றன.
Click it and Unblock the Notifications
Sign in with Google