பீகாரில் 133-148 இடங்களை வெல்லும் பாஜக கூட்டணி.. பிரசாந்த் கிஷோர் நிலை என்ன? People’s Insight சர்வே

Updated: Tuesday, November 11, 2025, 20:27 [IST]

Subscribe to Oneindia Tamil

பாட்னா: பீகார் சட்டசபைத் தேர்தலில் என்டிஏ கூட்டணி ஆட்சியே மீண்டும் அமையும் என்று People's Insight எக்ஸிட் போல் சர்வேவில் தெரிவிக்கப்பட்டுள்ளது. அதில் என்டிஏ கூட்டணிக்கு 133 முதல் 148 தொகுதிகளில் வெற்றி கிடைக்கும் என்றும், இந்தியா கூட்டணிக்கு 87 முதல் 102 தொகுதிகள் வரை வெற்றி கிடைக்கும் என்று தெரிவிக்கப்பட்டுள்ளது.

பீகார் மாநிலத்தில் இரு கட்டங்களாகச் சட்டசபைத் தேர்தல் நடைபெற்றது. நவம்பர் 6ஆம் தேதி நடைபெற்ற முதற்கட்ட வாக்குப்பதிவில் 121 தொகுதிகளுக்குத் தேர்தல் நடந்தது. இன்று இரண்டாம் கட்ட வாக்குப்பதிவில் 122 தொகுதிகளில் தேர்தல் நடந்தது. காலை முதலே பொதுமக்கள் ஆர்வமாகத் தேர்தலில் வாக்களித்தனர். மாலை 5 மணி வரை 67.14 சதவிகிதம் வரை வாக்குகள் பதிவாகியுள்ளது.

Bihar Election 2025 Exit Poll Results Bihar Assembly Election 2025

மாலை 6 மணியுடன் வாக்குப்பதிவு நிறைவடைந்த நிலையில், வரிசையில் நிற்கும் வாக்காளர்கள் கடைசி நேரத்தில் வாக்களித்து வருகின்றனர். பீகார் தேர்தலுக்கான வாக்கு எண்ணிக்கை நவம்பர் 14ம் தேதி நடைபெறுகிறது. அங்கு ஜேடியு - பாஜகவின் என்டிஏ கூட்டணிக்கும், ஆர்ஜேடி- காங்கிரஸின் இந்தியா கூட்டணிக்கும் இடையே தான் கடும் போட்டி இருக்கிறது.

நீண்ட ஆண்டுகளாக நிதீஷ் குமார் முதல்வராக இருப்பதால், அவர் மீது பொதுமக்கள் மத்தியில் அதிருப்தி ஏற்பட்டுள்ளதாக கூறப்பட்டது. அதேபோல் தேஜஸ்வி யாதவின் எழுச்சியும், இளைஞர்கள் மத்தியில் அவருக்கும் இருக்கும் ஆதரவு எதிர்பார்ப்பை ஏற்படுத்தியது. இந்த நிலையில் தேர்தலுக்கு பிந்தைய கருத்துக்கணிப்புகள் வெளியாகி இருக்கின்றன.

அதன்படி People's Insight எக்ஸிட் போல் சர்வேவில் என்டிஏ கூட்டணிக்கு 133 முதல் 148 தொகுதிகளில் வெற்றி கிடைக்கும் என்றும், இந்தியா கூட்டணிக்கு 87 முதல் 102 தொகுதிகள் வரை வெற்றி கிடைக்கும் என்று தெரிவிக்கப்பட்டுள்ளது. அதேபோல் தேர்தல் வியூக வகுப்பாளர் பிரசாந்த் கிஷோரின் ஜன் சுராஜ் கட்சிக்கு 0-2 இடங்கள் வரை கிடைக்கலாம் என்று தெரிவிக்கப்பட்டுள்ளது.

மற்ற கட்சிகள் 3 முதல் 6 தொகுதிகள் வரை வெல்லலாம் என்றும் கூறப்பட்டுள்ளது. இதனால் பீகாரில் மீண்டும் பாஜக - ஐக்கிய ஜனதா தளம் கட்சியின் ஆட்சியே நீடிக்கும் என்று பார்க்கப்படுகிறது. பெரும்பாலான எக்ஸிட் போல் முடிவுகளில் என்டிஏ கூட்டணியின் ஆட்சியே அமையும் என்று கூறப்பட்டுள்ளதால், பாஜகவினர் கொண்டாட்டத்தில் உள்ளனர்.