புதுச்சேரியில் ரங்கசாமியின் ஜாதக அரசியலால் வினை.. பாஜக அலுவலகத்தை சூறையாடிய ஜான்குமார் ஆதரவாளர்கள்

Updated: Saturday, June 19, 2021, 16:51 [IST]

Subscribe to Oneindia Tamil

புதுச்சேரி: புதுச்சேரியில் அமைச்சர் பதவி வழங்கக் கோரி ஜான்குமார் எம்.எல்.ஏ. ஆதரவாளர்கள் அம்மாநில பாஜக அலுவலகத்தை சூறையாடியதால் பதற்றம் ஏற்பட்டது.

புதுச்சேரியில் முந்தைய காங்கிரஸ் ஆட்சியை கடைசி நேரத்தில் கவிழ்த்தவர் ஜான்குமார். பின்னர் பாஜகவில் இணைந்தார். சட்டசபை தேர்தலில் போட்டியிட்டு வென்ற ஜான்குமார் எப்படியும் அமைச்சராகிவிடுவோம் என கனவு கண்டார்.

பாஜகவுக்கு 2 அமைச்சர்கள்

புதுச்சேரியில் முதல்வராக பொறுப்பேற்ற ரங்கசாமி, பாஜகவுக்கு 2 அமைச்சர்கள், ஒரு சபாநாயகர் பதவிதான் என்பதில் உறுதியாக இருந்தார். இதனடிப்படையில் சபாநாயகர் பதவி பாஜகவுக்கு கிடைத்துவிட்டது.

ரங்கசாமியின் ஜாதக அரசியல்

இதனிடையே தமது அமைச்சரவையில் யார் யார் இடம் பெற வேண்டும் என்பதை எம்.எல்.ஏக்களின் ஜாதகங்களை வைத்து ஆலோசித்து வருகிறாராம் ரங்கசாமி. இந்த ஜாதக அரசியலில் ஜான்குமாருக்கு அமைச்சர் பதவி கிடைக்கப் போவதில்லை என தெரியவந்தது.

போராடியும் பயனில்லை

அமைச்சர் பதவிக்கு ஆசைப்பட்டுதான் ஒரு ஆட்சியையே கவிழ்த்து பாஜக எம்.எல்.ஏ.வானோம்.. இப்போது அமைச்சர் பதவி கிடைக்காமல் போய்விடுமோ, எல்லோருக்கும் போல தமக்கும் பாஜக துரோகம் இழைக்குமோ என்கிற பதைபதைப்பில் டெல்லியில் டேரா போட்டுள்ளார் ஜான்குமார். ஆனால் ஜான்குமாருக்கு அமைச்சர் பதவி கிடைக்காது என்பது தெரிந்துபோய்விட்டது.

பாஜக அலுவலகம் சூறை

இதனால் கொந்தளித்து போன ஜான்குமாரின் ஆவரவாளர்கள் 100-க்கும் மேற்பட்டோர் புதுச்சேரியில் உள்ள பாஜக தலைமை அலுவலகத்தை திடீரென முற்றுகையிட்டனர். பாஜக அலுவலகத்தின் கேட்டையும் அடித்து உடைத்து துவம்சம் செய்தனர். அங்கு வைக்கப்பட்டிருந்த பேனர்களை கிழித்து எறிந்தனர். பாஜக தலைமையை கண்டித்தும், உடனடியாக ஜான்குமாருக்கு அமைச்சர் பதவி வேண்டும் என கோரி கோஷங்களை எழுப்பி தர்ணா போராட்டத்தில் ஈடுபட்டனர். இதனால் அப்பகுதியுல் பதற்றமும் பரபரப்பும் ஏற்பட்டது. இதனையடுத்து போலீசார் அவர்களை சமாதானம் செய்து அனுப்பி வைத்தனர்.