புதுவை தேர்தலில் விஜய்க்கு ஜாக்பாட்- பாஜகவிடம் இருந்து தப்பித்து கை கோர்க்கும் என்.ஆர். காங்கிரஸ்?
புதுச்சேரி: புதுச்சேரியில் 2026-ம் ஆண்டு நடைபெறும் சட்டசபை தேர்தலில் பாஜக தலைமையிலான கூட்டணியை உதறிவிட்டு நடிகர் விஜய் தொடங்கி இருக்கும் தமிழக வெற்றிக் கழகத்துடன் கை கோர்க்க ஆளும் என்.ஆர். காங்கிரஸ் முடிவு செய்திருப்பதாக வெளியான தகவலால் புதுவை அரசியல் வட்டாரங்கள் பரபரப்பாகி உள்ளன.
நடிகர் விஜய்யின் தமிழக வெற்றிக் கழகத்தின் பொதுச்செயலாளர் புஸ்ஸி ஆனந்த், புதுச்சேரியைச் சேர்ந்தவர். புதுச்சேரி முதல்வர் ரங்கசாமியுடன் மிக நெருக்கமானவர். 2 ஆண்டுகளுக்கு முன்னரே சென்னையை அடுத்த பனையூரில் நடிகர் விஜய்யை நேரில் சந்தித்து புதிய கட்சி தொடங்குவதற்கான ஆலோசனைகளை வழங்கியவர் புதுச்சேரி முதல்வர் தரங்கசாமிதான்.
இந்த நிலையில் நடிகர் விஜய் தமது தமிழக வெற்றிக் கழக மாநாட்டில் பேசிய பேச்சை புகழ்ந்து தள்ளியிருக்கிறார் ரங்கசாமி. இது தொடர்பாக ரங்கசாமி கூறுகையில், நடிகர் விஜய் சினிமாவில் இருந்து விலகி அரசியலுக்கு வந்துவிட்டார். விஜய் நினைத்திருந்தால் மேலும் பல சினிமா படங்களில் நடித்து கோடி கோடியாக பணம் சம்பாதிக்கவும் முடியும். ஆனால் மக்களுக்கு நல்லது செய்யவே அரசியலுக்கு வந்துள்ளார் நடிகர் விஜய். இதற்காக அவரைப் பாராட்ட வேண்டும்.
தமிழக வெற்றிக் கழகத்தின் மாநாட்டில் இளைஞர்களின் எழுச்சியை பார்க்க முடிந்தது. நடிகர் விஜய் பல வெற்றிகளைப் பெற வாழ்த்துகிறேன் என்றார்.
புதுச்சேரியில் தற்போது முதல்வர் ரங்கசாமியின் என்.ஆர். காங்கிரஸ், பாஜக தலைமையிலான தேசிய ஜனநாயகக் கூட்டணியில் இடம் பெற்றுள்ளது. 2021-ம் ஆண்டு முதலே பாஜகவுடன் பல்வேறு பிரச்சனைகளில் முரண்பாடுகள் இருந்த போதும் தொடர்ந்து அந்த கூட்டணியிலேயே என்.ஆர்.காங்கிரஸ் நீடித்து வந்தது. தற்போது தமது ஆலோசனையின் பேரில் கட்சி தொடங்கிய நடிகர் விஜய்யை முதல்வர் ரங்கசாமி ஆதரிக்கதான் செய்வார்; 2026 சட்டசபை தேர்தலில் என்.ஆர். காங்கிரஸ்- விஜய்யின் தமிழக வெற்றிக் கழகம் கூட்டணி அமைத்து தேர்தலை சந்திக்கும் என்கின்றன புதுவை அரசியல் வட்டாரங்கள்.
Click it and Unblock the Notifications
Sign in with Google