புதுச்சேரி அரசியலில் களமிறங்கிய மார்ட்டின் மகன்! ’லட்சிய ஜனநாயக கட்சி’யை தொடங்கிய சார்லஸ் மார்ட்டின்

Updated: Wednesday, December 10, 2025, 17:00 [IST]

Subscribe to Oneindia Tamil

புதுச்சேரி: தமிழக அரசியலைப் போலவே புதுச்சேரி அரசியலிலும் பரபரப்பு நிலவுகிறது. தமிழக வெற்றிக் கழகம் புதுச்சேரியில் கால் பதிக்க நினைக்கும் நிலையில் புதிய கட்சி ஒன்று உருவாகி இருக்கிறது. தமிழக வெற்றிக் கழகத்தின் நிர்வாகியான ஆதவ் அர்ஜுனாவின் உறவினரும், லாட்டரி அதிபர் சாண்டியாகோ மார்ட்டின் மகனுமான ஜோஸ் சார்லஸ் மார்ட்டின் "லட்சிய ஜனநாயக கட்சி என்ற புதிய கட்சி ஒன்றை தொடங்கி இருக்கிறார்.

தமிழகத்தைப் போலவே 2026 ஆம் ஆண்டு புதுச்சேரியிலும் சட்டமன்ற தேர்தல் நடைபெற இருக்கிறது. தற்போது ஆளும் பாஜக- என்ஆர் காங்கிரஸ் கூட்டணிக்கு போட்டியாக புதிய கூட்டணி உருவாகும் என எதிர்பார்க்கப்படுகிறது.

ஏற்கனவே காங்கிரஸ் திமுக கூட்டணி அங்கு எதிர்க்கட்சியாக இருக்கும் நிலை தமிழக வெற்றிக்கழகத்தின் வரவு பல்வேறு கூட்டணி கணக்குகளை உருவாக்கி இருக்கிறது. தற்போது தமிழக வெற்றி கழகத்தின் பொதுச் செயலாளராக இருக்கும் புஸ்ஸி ஆனந்த் புதுச்சேரியைச் சேர்ந்தவர் தான்.

புதுச்சேரி அரசியல்

புஸ்ஸி தொகுதியில் அவர் எம்எல்ஏவாக இருந்ததும் குறிப்பிடத்தக்கது. இது ஒருபுறம் இருக்க தமிழக வெற்றி கழகத்தின் தேர்தல் பிரச்சார மேலாண்மை பிரிவு செயலாளராக இருக்கும் ஆதவ் அர்ஜுனா பார்வையும் புதுச்சேரி பக்கமே இருக்கிறது. காரணம் அவரது மாமனாரும் பிரபல லாட்டரி அதிபருமான சாண்டியாகோ மார்ட்டின் புதுச்சேரியில் தான் இருக்கிறார். அவரது மகனான ஜோஸ் சார்லஸ் மார்ட்டினும் புதுச்சேரி அரசியலில் கவனம் செலுத்தி வருகிறார்.

ஜோஸ் சார்லஸ் மார்ட்டின்

ஏற்கனவே ஜேசிஎம் அமைப்பின் மூலம் பல்வேறு நலத்திட்ட உதவிகளையும், நிகழ்ச்சிகளையும் நடத்தி வருகிறார். மேலும் பள்ளி கல்லூரி மாணவிகளுக்கு உதவுவது, மாற்றுத் திறனாளிகளுக்கான நலத்திட்டங்களையும் செயல்படுத்தி வருகிறார். இந்த நிலையில் 2026 சட்டமன்ற தேர்தலில் சார்லஸ் மார்ட்டின் களமிறங்கலாம் என சொல்லப்படுகிறது.

புதிய கட்சி

புதிய கட்சி ஆரம்பித்து தனித்தோ அல்லது கூட்டணி அமைத்தோ போட்டியிடலாம் எனவும் சொல்லப்படுகிறது. இந்த நிலையில் சமீபத்தில் ஜெனிவாவில் நடைபெற்ற நிகழ்ச்சி ஒன்றில் "லட்சிய ஜனநாயக கட்சி" என்ற தனது கட்சியின் பெயரையும் அறிவித்திருக்கிறார்.